जनकपुरधाम, १४ चैत । जनकपुरधामको मुस्कान अस्पतालमा पित्तथैलीको शल्यक्रिया गराएकी २५ वर्षीया बबिता कुमारी यादवको स्वास्थ्य सुधारको क्रममा छैन । माघ ३० गतेदेखि काठमाडौं मेडिकल कलेज (केएमसी) मा उपचाररत बबिता अहिले पनि बेहोस अवस्थामा रहेको र होस फर्काउने प्रक्रिया लामो समयदेखि असफल भएको परिवारका सदस्यहरूले जनाएका छन् ।

उनका श्रीमान् अंगेशकुमार यादवका अनुसार आर्थिक अभावका कारण बबिताको उपचारमा कठिनाइ आउन थालेको छ । उनले भने, ‘अक्सिजन पाइप हटाएपछि २४ घण्टासम्म आफैं सास फेर्न सकिन् । तर, औषधि नपाउँदा फेरि पुरानो अवस्थामा फर्किइन् ।’ बबिताको उपचारमा औषधि र स्वास्थ्य सेवामा लगानी गर्न पर्याप्त पैसा नभएपछि समस्या अझ जटिल बन्दै गएको हो ।

अंगेशका अनुसार अस्पतालले उपचार जारी राखे पनि फार्मेसीले उधारो दिन अस्वीकार गरेको कारण आर्थिक समस्या थप भएको छ । ‘अस्पतालको फार्मेसीमा एक लाख रुपैयाँ उधारो छ । ५ लाखभन्दा बढी औषधिमा खर्च भइसकेको छ,’ उनले भने ।

आर्थिक कठिनाइका कारण अंगेश श्रीमतीलाई उपचारका लागि आफन्तको जिम्मामा छाडेर गाउँ फर्केर ऋण खोज्न बाध्य भएका छन् । ‘गाउँमा ऋण खोज्न कठिनाई भइरहेको छ । मैले २० हजार रुपैयाँ उधारो मागेर बुझाएँ र अहिले ऋण लिने प्रयास गर्दैछु,’ उनले गुनासो गरे ।

बबिताका परिवारका अनुसार बबिताको घरको आर्थिक स्थिति कमजोर छ । अंगेश भारतको हैदराबादमा सिउने कारखानामा काम गर्दै थिए । तर, श्रीमतीको स्वास्थ्य बिग्रिएको खबर पाएपछि उनलाई नेपाल फर्कनु परेको थियो ।

घटनापछि मधेश प्रदेशका मुख्यमन्त्री सतिशकुमार सिंहले जनकपुरधामको पीडारी चोकस्थित मुस्कान अस्पतालको आकस्मिक निरीक्षण गरेका थिए । अस्पताल बिना स्वीकृतिमा सञ्चालन भइरहेको भेटिएपछि मुख्यमन्त्री सिंहले अस्पताल बन्द गर्न निर्देशन दिएका थिए । उनले बबिताको उपचार खर्च व्यहोर्न अस्पताल प्रशासनलाई आदेश दिएका थिए ।

तर, अस्पताल प्रशासनले अहिलेसम्म कुनै प्रभावकारी सहयोग नगरेको र बबिता यादवको परिवारले हालसम्म अस्पतालको सहयोगलाई अत्यन्त न्यून भएको गुनासो उठाएका छन् । प्रदेश सरकारको निर्देशनपछि मुस्कान अस्पतालले बबिताका लागि एक लाख रुपैयाँ मात्र सहयोग गरेको छ ।

बबिताको परिवार न्यायको प्रतीक्षामा दुःख भोगिरहेका छन् । अस्पताल सञ्चालकमाथि अहिलेसम्म कुनै कारबाही नभएको र उपचार खर्चको भार उठाउन असमर्थ रहेको परिवारका सदस्यहरूको भनाइ छ ।