चितवन, १२ चैत । नेपाल विद्युत् प्राधिकरण भरतपुर वितरण केन्द्रका प्रमुख रामु श्रेष्ठमाथि मङ्गलबार बिहान हातपात भएको छ । वितरण केन्द्रमा ३५–४० जनाको समूह प्रवेश गरी कार्यालय प्रमुख श्रेष्ठमाथि कुटपिट गर्नुका साथै कार्यकक्षमा तोडफोड गरेका हुन् ।

केन्द्रले जारी गरेको विज्ञप्तिमा घटनाको विस्तृत विवरण दिँदै कार्यालयको डिजिटल सूचना बोर्डमा प्रधानमन्त्री केपी शर्मा ओलीविरुद्ध आपत्तिजनक र अमर्यादित सूचना प्रकाशित भएको बताइएको छ । सो सूचना ह्याक गरेर अपलोड गरिएको दाबी गर्दै कार्यालयले घटनाको कडा भत्र्सना गरेको छ ।

डिजिटल बोर्डमा देखिएको अपमानजनक सूचना प्रधानमन्त्रीजस्तो गरिमामय पदमा रहेका व्यक्तिलाई अपमानित गर्ने प्रयास भएको र यसप्रकारको कार्य संविधान र प्रचलित कानुनविपरीत भएको भन्दै केन्द्रले घटनाको छानबिन र दोषीमाथि कानुनी कारबाहीको माग गरेको छ ।

सूचना बोर्डमा प्रधानमन्त्रीविरुद्धको अमर्यादित सूचनाका कारण नेकपा एमाले निकट राष्ट्रिय युवा संघका कार्यकर्ताहरू वितरण केन्द्रमा पुगेका थिए । युवा संघले सो कार्यको विरोध गर्दै ज्ञापनपत्र बुझाउने क्रममा कार्यालय प्रमुख श्रेष्ठले आफूहरूसँग गलत व्यवहार गरेको आरोप लगाएका छन् ।

युवा संघ चितवनका इन्चार्ज शंकर अधिकारीले कार्यालय प्रमुखको गलत व्यवहारका कारण आक्रमण भएको दाबी गरेका छन् । अधिकारीले श्रेष्ठकै योजनामा सूचना बोर्डमा अमर्यादित सामग्री राखिएको आरोप पनि लगाए ।

यता, प्रमुख रामु श्रेष्ठले भने युवा संघका कार्यकर्ताहरूले आफ्नो कार्यकक्षमा जबरजस्ती प्रवेश गरी कुटपिट गरेको दाबी गरेका छन् । घटनापछि आक्रोशित कार्यकर्ताहरूले श्रेष्ठको कार्यकक्षमा ताला पनि लगाएका थिए । प्रमुख जिल्ला अधिकारी प्रकाश पौडेलले ताला फुटाउने निर्देशन दिँदै घटनाको यथार्थ विवरणसहित स्पष्टीकरण माग गरेका छन् ।

प्रधानमन्त्रीविरुद्ध सरकारी कार्यालयको डिजिटल सूचना बोर्डमा आपत्तिजनक सूचना प्रकाशन भएको घटनाबारे अनुसन्धान थालिएको छ । प्रमुख जिल्ला अधिकारी पौडेलले २४ घण्टाभित्र घटनाको पूर्ण विवरण पेश गर्न श्रेष्ठलाई निर्देशन दिएका छन् । यसबारेमा छानबिनपछि गृह मन्त्रालय र ऊर्जा मन्त्रालयलाई जानकारी पठाइने बताइएको छ ।