जनकपुरधाम, १२ चैत । सीके राउत नेतृत्वको जनमत पार्टी र रेशम चौधरी संरक्षक रहेको नागरिक उन्मुक्ति पार्टीले आपसमा एकता गर्ने निर्णय गरेका छन् । जनमतका अध्यक्ष डा. सीके राउत र नागरिक उन्मुक्ति पार्टीकी अध्यक्ष रंजिता श्रेष्ठका साथै पार्टीका संरक्षक रेशम चौधरीले सार्वजनिक गरेका छन् ।

एकता प्रक्रियामा दुवै पार्टीले साझा राय बनाएर कार्यदल समेत गठन गरेका छन् । कार्यदलको उद्देश्य पार्टी एकताका विविध पक्षलाई ध्यानमा राखी विभिन्न महत्वपूर्ण विषयमा छलफल गर्न हुनेछ । नागरिक उन्मुक्ति पार्टीकी अध्यक्ष श्रेष्ठले यो एकता प्रक्रियामा चुनाव चिन्ह, पार्टीको नाम र नेतृत्वको विषयमा छलफल भइरहेको जानकारी दिइन् ।

कार्यदलमा नागरिक उन्मुक्ति पार्टीबाट गङ्गाराम चौधरी, सुनिता चौधरी र रामलाल डगौरा तथा जनमत पार्टीबाट अब्दुल खाँण, सरदसिंह यादव र बालगोविन्द चौधरीलाई समावेश गरिएको छ । अध्यक्ष श्रेष्ठका अनुसार कार्यदललाई १५ दिनको समयसीमा दिइएको छ । यो समयभित्र दुवै पार्टी एकताको विषयमा छलफल गरेर अन्तिम निर्णय लिनुपर्नेछ ।

पार्टी एकतापछि सङ्घीय संसदमा जनमत पार्टीका ६ जना र नागरिक उन्मुक्ति पार्टीका ४ जना सांसद गरी कुल १३ सांसद हुनेछन् ।

श्रेष्ठले पार्टी एकताको विषयलाई अझ स्पष्ट पार्दै भनिन्, ‘पार्टीको नाम, नेतृत्व र चुनाव चिन्हका विषयमा छलफल चलिरहेकै छ । यस एकताले कुनै पनि पक्षको आक्रमण नगर्ने र साझा जिम्मेवारीका साथ नयाँ राजनीतिक मार्गमा अघि बढ्ने सुनिश्चितता दिएको छ ।’