जनकपुरधाम, १२ चैत । प्रेस चौतारी नेपालको १०औं राष्ट्रिय महाधिवेशनमा मधेश प्रदेशबाट पत्रकारहरूको सशक्त प्रतिनिधित्वले केन्द्रमा पकड जमाएको छ । महाधिवेशनबाट नयाँ कार्यसमितिमा मधेश प्रदेशका धनुषा, महोत्तरी, सर्लाही, सप्तरी, रौतहट र बारा जिल्लाबाट पत्रकारहरूको बलियो पकड देखिएको हो ।

धनुषा जिल्लाबाट पत्रकारिता क्षेत्रमा लामो समयदेखि सक्रिय रहँदै आएका प्रवीण साह, धर्वेन्द्र झा, अवधेश कामत र नेपाल पत्रकार महासंघ मधेश प्रदेशकी महिला उपाध्यक्ष ज्योति झा निर्वाचित भएका छन् ।

प्रवीण साहले भने, ‘हामीलाई मधेशको पत्रकारितालाई राष्ट्रिय स्तरमा प्रतिनिधित्व गर्न अवसर भेटेको छ । हामीले मधेश प्रदेशको आवाजलाई केन्द्रीय मञ्चमा पुर्याउन सफल भएका छौँ ।’ त्यस्तै, धर्वेन्द्र झा, अवधेश कामत र ज्योति झाले पनि यो अवसरलाई मधेशका पत्रकारहरूको हकअधिकार र गरिमालाई अझ बलियो बनाउन उपयोग गर्ने प्रतिवद्धता व्यक्त गरे ।

ज्योतिले भनिन्, ‘महिलाहरूको हकहितका लागि म पत्रकारितामा आवाज उठाउँदै आएकी छु । यो जीतले मलाई राष्ट्रिय स्तरमा महिलाको हक र अधिकारलाई अझ सशक्त रूपमा उठाउने अवसर प्रदान गरेको छ ।’

त्यस्तै, महोत्तरी जिल्लाबाट सुनिताकुमारी महतो केन्द्रिय सदस्य पदमा निर्वाचित भएकी छन् । सर्लाही जिल्लाबाट बख्तियार अली र रिना आले केन्द्रिय सदस्य पदमा निर्वाचित भएका छन् । अलीले सर्लाहीको पत्रकारितालाई केन्द्रीय मञ्चमा पुर्याउँदै आफ्नो अनुभव र दृष्टिकोणलाई प्रस्तुत गरेका छन् । आलेले पनि महिलाहरूको आवाजलाई पत्रकारितामा सशक्त रूपमा उठाउन आफू तत्पर रहेको बताइन् ।

रौतहट जिल्लाबाट प्रेमचन्द झा र रमेश तिमल्सिनाले केन्द्रिय सदस्य पदमा निर्वाचित भएका छन् । उनीहरूले रौतहटको पत्रकारितालाई केन्द्रमा पुर्याउने जिम्मेवारीलाई सम्मानजनक रूपमा निर्वाह गर्ने प्रतिबद्धता व्यक्त गरेका छन् । झाले भने, ‘मधेशको पत्रकारिता क्षेत्रलाई राष्ट्रिय मञ्चमा पुर्याउने हाम्रो मुख्य उद्देश्य हुनेछ ।’

त्यस्तै, सप्तरीबाट नेपाल पत्रकार महासंघका सचिव खगेन्द्र कार्की प्रेस चौतारी नेपालको केन्द्रीय सदस्यमा निर्वाचित भएका छन् । बारा जिल्लाबाट भने इन्दिप कोइराला केन्द्रिय सदस्य पदमा निर्वाचित भएका छन् ।

प्रेस चौतारी नेपालको नयाँ नेतृत्वले पत्रकारहरूको हकअधिकार र दायित्वलाई अझ सशक्त बनाउँदै पत्रकारिताको मर्यादा कायम गर्न ध्यान दिने बताएका छन् ।