काठमाडौं, ११ चैत । लामो समयदेखि नेपाल विद्युत प्राधिकरणको नेतृत्वमा रहेका लोकप्रिय कार्यकारी निर्देशक कुलमान घिसिङलाई बर्खास्त गर्दै सरकारको निर्णयले व्यापक चर्चा पाएको छ ।

सोमबार साँझ बसेको मन्त्रिपरिषद् बैठकले घिसिङलाई पदमुक्त गर्दै हितेन्द्रदेव शाक्यलाई नयाँ कार्यकारी निर्देशक नियुक्त गर्ने निर्णय गरेको छ ।

कुलमान घिसिङले आफ्नो कार्यकालमा लोडशेडिङको अन्त्य गर्दै जनतामाझ लोकप्रियता हासिल गरेका थिए । तर, पछिल्ला केही महिनादेखि उनको कार्यसम्पादनलाई लिएर विवाद उठ्दै आएको थियो । विभागीय मन्त्रीले पाँचपटकसम्म स्पष्टीकरण मागे पनि सन्तोषजनक जवाफ नआएको भन्दै उनलाई हटाउने निर्णयमा पुगेको सरकार स्रोतले जनाएको छ ।

ऊर्जा मन्त्रालयका सहसचिव जिवछ मण्डलको संयोजकत्वमा बनेको कार्यसम्पादन मूल्यांकन समितिले कुलमानलाई शून्य अंक दिने निर्णय गरेको थियो । त्यसको आधारमा उनको कार्यसम्पादन कमजोर ठहर्याइएको हो । कुलमानले भने आफूलाई ९८ अंक पाउनुपर्ने दाबी गर्दै आएका छन् ।