जनकपुरधाम, ११ चैत । मधेश प्रदेशका मुख्यमन्त्री सतिशकुमार सिंहले जनकपुरधाममा अनौठो शैलीमा होटेलहरूको अनुगमन गरेका छन् । उनले मोटरसाइकल चलाउँदै जनकपुरधामका प्रमुख होटलहरू यात्री निवास, लक्ष्मी मिष्ठान, छपररियालगायत दर्जनभन्दा बढी होटलको निरीक्षण गरेका हुन् ।

अनुगमनको क्रममा उनले होटलका सेवालाई सिधा सेवाग्राहीका नजरबाट हेरेको र आफ्नो अनुभवबाट प्रशासनलाई सुधारका लागि सुझाव दिन चाहेको बताए ।

मुख्यमन्त्री सिंहले जनकपुरधामका विभिन्न होटेलहरूको छड्के अनुगमन गर्दै होटलका सर्भिस, सरसफाइ र कर्मचारीहरूको व्यवहारलाई नियालेको बताए । उनले होटलका सबै पक्षहरूको निरीक्षण गरेका छन् ।

सिंहले भने, ‘होटल उद्योगमा हुने सबै कमीकमजोरीलाई छानबिन गर्दा हाम्रो प्रशासनलाई तिनीहरूको सुधारको लागि आवश्यक कदम चाल्न मद्दत पुग्नेछ । प्रशासनिक सुधार र जनताको चासोका लागि यो प्रक्रिया अनिवार्य छ ।’ उनका अनुसार प्रशासनले जनताको चासो र आवश्यकतालाई प्राथमिकतामा राखेर काम गर्नुपर्ने आवश्यकता छ ।

मुख्यमन्त्री सिंहले यसअघि जनकपुरधाम र मधेशका अन्य जिल्लामा निजी अस्पतालहरूको पनि छड्के अनुगमन गरेका थिए । आफ्नो मुख्य उद्देश्य स्वास्थ्य सेवामा सुधार ल्याउनु र त्यहाँ रहेका समस्याहरूलाई उजागर गर्दै सम्बोधन गर्नु रहेको उनले बताए । उनले भने, ‘स्वास्थ्य सेवामा सुधार नभएसम्म जनताको जीवन र स्वास्थ्यको सुरक्षा गर्न असम्भव छ । अस्पतालहरूको अनुगमन गरेर म समस्याको जड पहिचान गर्नेछु र त्यसको समाधान खोज्नेछु ।’

अस्पतालहरूको अनुगमनको क्रममा आफूले व्यवस्थापन, स्वास्थ्यकर्मीहरूको दक्षता र सुविधाहरूको अवस्थालाई मध्यनजर गर्दै नागरिकका समस्याहरूको समाधानको प्रयास गरेको उनले बताए ।

उनका अनुसार, ‘जनतासँग संवाद गर्नु, उनीहरूको समस्याहरू सुन्नु र त्यसको समाधान गर्न सक्रिय हुन जरुरी छ । हामी जब जनताको समस्यामा प्रत्यक्ष संलग्न हुनेछौं । त्यसपछि मात्र हामी प्रशासनिक रूपमा प्रभावकारी हुन सक्छौं ।’

मुख्यमन्त्री सिंह जनकपुरधामका विभिन्न होटलमा पुगेर आफैं सेवाग्राहीको रूपमा समस्याहरूलाई बुझ्ने प्रयास गरेका छन् ।

सिंहले भने, ‘हाम्रो सरकारको उद्देश्य भनेको जनताको सेवा र कसमसलाई बुझेर तिनीहरूको आवश्यकतामा आधारित काम गर्नु हो । यसरी अनुगमनको माध्यमबाट हामी प्रशासनको सुदृढीकरण र नागरिकको सन्तुष्टि प्राप्त गर्न सक्दछौं ।’