जनकपुरधाम, ११ चैत । नेकपा एमालेले आगामी चैत १८ गते जनकपुरधाममा गणतन्त्रको रक्षाका लागि राजतन्त्रको विरोधमा मोटरसाइकल र्याली निकाल्ने निर्णय गरेको छ ।

जनकपुरधाम उपमहानगरपालिका वडा नम्बर–१३ स्थित नेकपा एमालेका वडा कमिटी अध्यक्ष अजिज राइनको अध्यक्षतामा भएको बैठकमा यस र्याली आयोजनाको बारेमा निर्णय भएको हो ।

बैठकमा सहभागि नेता तथा कार्यकर्ताहरूले गणतन्त्रको संरक्षणका लागि राजतन्त्रको विरोध गर्ने उद्देश्यले मोटरसाइकल र्यालीको आयोजना गर्नुपर्ने निर्णय गरेका थिए । र्यालीमा जनकपुरधामका सबै वडा कमिटीहरूले सहभागिता जनाउने र पार्टीका कार्यकर्ताहरूले यसको आयोजनामा सक्रिय भइ जनतालाई सचेत गराउने योजना बनाइएको छ ।

नेकपा एमालेका नेता संतोष यादवले भने, ‘गणतन्त्रको रक्षा र जनताको अधिकारका लागि पार्टी सधैं संघर्षरत रहनेछ । आगामी र्यालीमा धेरै जनसहभागिता देख्न पाउनेछौं ।’

राजतन्त्रको विरोध मात्र नभएर जनकपुरधाम र सम्पूर्ण मधेश क्षेत्रमा एमाले पार्टीको जनसम्पर्कलाई मजबुत बनाउने र आगामी निर्वाचनका लागि पार्टीलाई बलियो बनाउन मोटरसाइकल ¥यालीको उद्देश्य रहेको उनले बताए ।

नेकपा एमालेका केन्द्रीय परिषद् सल्लाहकार समितिका सदस्य संतोष यादव प्रमुख अतिथि रहेको बैठकमा धनुषा क्षेत्र नं. ४(क) का प्रदेश इन्चार्ज राम उदित राम, वडा कमिटी उपाध्यक्ष उपेन्द्र पाण्डे, पूर्ववडाअध्यक्ष शुभ नारायण मण्डल र वडाअध्यक्ष पदका प्रत्यासी राम सेवक साह लगायत पार्टीका विभिन्न नेता र कार्यकर्ताहरूको उपस्थिति रहेको थियो ।