जनकपुरधाम, ११ चैत । मधेश प्रदेशका गृह, सञ्चार तथा कानून मन्त्री राजकुमार लेखीले धनुषाका पत्रकारहरू ‘अल्छि’ भएको आरोप लगाएका छन् ।

उनले सोमवार आयोजित पत्रकार आचारसंहिता पालना सम्बन्धी गोष्ठीमा बोल्दै पत्रकारहरूको कार्यशैलीमा सुधारको आवश्यकता रहेको भन्दै गम्भीर टिप्पणी गरेका हुन् । मन्त्री लेखीले पत्रकारहरूको लेखन र बोल्ने क्षमतामा कमी रहेको बताए ।

मन्त्री लेखीले धनुषामा २ सय पत्रकारहरू रहेको अनुमान गर्दै सो कार्यक्रमको सहभागीमा ४५ जना मात्र उपस्थित रहेको र तिनमा पनि १३–१४ जना मात्रै बोल्न र लेख्न सक्षम रहेको बताएका थिए । उनका अनुसार, ‘आजभन्दा २५–३० वर्ष अगाडि जसरी पत्रकारिता मिसनका रूपमा रहेको थियो, अहिले त्यसको अवस्था निकै परिवर्तन भएको छ । अहिलेका पत्रकारहरू अल्छि भएका छन् । उनीहरूसँग लेख्न र बोल्नका लागि आवश्यक ल्याकत छैन ।’

उनले थपे, ‘पत्रकारिता पेशालाई सम्मानित बनाउने जिम्मेवारी सरकारको भन्दा पत्रकारकै हातमा छ । पत्रकारहरूले आफूलाई पेशागत मर्यादामा बाँधेर काम गर्नुपर्ने आवश्यकता छ । पत्रकारितामा सुधार गर्न सरकारको भूमिका भनेको पत्रकारलाई सहयोग गर्नु हो । तर, प्रमुख जिम्मेवारी सञ्चारकर्मीकै हो ।’

मन्त्री लेखीको यस बयानले पत्रकारहरूको बीचमा असन्तुष्टि पैदा गरेको छ । नेपाल पत्रकार महासंघ धनुषाका पूर्वअध्यक्ष अनिल मिश्रले मन्त्री लेखीको भनाइको विरोध गर्दै भने, ‘पत्रकारहरूको कार्यशैलीमा सुधारको आवश्यकता छ भने त्यो संवाद र सहकार्यबाट हुन सक्छ, न कि आरोप र आलोचनाबाट ।’ मिश्रका अनुसार मन्त्रीले पत्रकारिता पेशाको सम्मान र भूमिका बुझ्न जरुरी छ ।