जनकपुरधाम, ११ चैत । नेकपा माओवादी केन्द्रले हुलाकी राजमार्ग केन्द्रित तराई–मधेस जागरण अभियानलाई पाँच दिनका लागि पुनः स्थगित गरेको छ ।

चैत १५ गते काठमाडौँमा गणतन्त्र पक्षको वृहत् जनप्रदर्शनको तयारीका लागि अभियान स्थगित गरिएको माओवादी केन्द्रका अध्यक्ष पुष्पकमल दाहाल प्रचण्डका प्रेस सल्लाहकार गोविन्द आचार्यले जानकारी दिए ।

प्रेस सल्लाहकार आचार्यका अनुसार अभियान चैत १६ गतेबाट पुनः सुरु गरिनेछ । यस समयमा कुनै नयाँ कार्यक्रम तय नगरिए पनि माओवादी अध्यक्ष प्रचण्ड चितवनमा रहेका छन् । साँझ प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा र प्रमुख प्रतिपक्ष दलका नेतासँग सिंहदरबारमा हुने महत्वपूर्ण भेटवार्ताका लागि प्रचण्ड आज काठमाडौँ जान लागेका हुन् ।

माओवादी केन्द्रको यो अभियान झापाको कचनकवलबाट फागुन १२ गते सुरु भएको थियो । अभियान फागुन २४ गते रौतहटमा स्थगित गरिएको थियो । गत बिहीबारबाट बाराबाट पुनः सुरु भएको यो अभियान हालसम्म झापा, मोरङ, सुनसरी, सप्तरी, सिराहा, धनुषा, महोत्तरी, सर्लाही, रौतहट, बारा, पर्सा र चितवनमा सम्पन्न भइसकेको छ ।

अब यो जागरण अभियानलाई नवलपुर, नवलपरासी पश्चिम, रुपन्देही, कपिलवस्तु, दाङ, बर्दिया, बाँके, कैलाली हुँदै कञ्चनपुरसम्म विस्तार गर्दै अघि बढाइनेछ । यस अभियानले तराई–मधेस क्षेत्रमा व्यापक जनसरोकारलाई सम्बोधन गर्दै आएको माओवादी केन्द्रको योजना अब मध्य पहाडी क्षेत्रमा केन्द्रित रहने छ । यो अभियानलाई सगरमाथाको फेदीसम्म पु¥याउने माओवादी केन्द्रको रणनीतिक योजना रहेको छ ।

चैत १५ गते काठमाडौँमा हुने गणतन्त्र पक्षको वृहत् जनप्रदर्शनका लागि माओवादी केन्द्रले आफ्नो ध्यान केन्द्रित गरेको छ ।