जनकपुरधाम, ९ चैत । नेपाल समाजवादी पार्टी (नयाँ शक्ति) का अध्यक्ष डा. बाबुराम भट्टराईले राजतन्त्रलाई भूतको रूपमा परिभाषित गर्दै त्यसबारेको चर्चा मात्र भ्रम भएको बताएका छन् । जनकपुरधाममा आयोजित पत्रकार सम्मेलनमा बोल्दै भट्टराईले राजतन्त्रको पुनस्र्थापना असम्भव भएको स्पष्ट पार्दै यसबारे कल्पना गर्नु निरर्थक र निराशाजनक प्रयास भएको बताए ।

उनले भने, ‘राजतन्त्र अब केवल भूत हो । र, यस्तो भूतबारे भ्रम पालेर हिँड्नेहरू निराशा र काल्पनिक सपनामा बाँच्छन् । उनीहरूको वास्तविक संसारसँग न कुनै सम्बन्ध छ, न त कुनै सम्भावना ।’ भट्टराईले अहिलेको युगमा राजतन्त्र फर्काउने प्रयासलाई यथार्थबोध नगरेको र असफल प्रयासको संज्ञा दिए ।

राजनीतिक अवस्था र लोकतन्त्रको सन्दर्भमा भट्टराईले मधेश क्षेत्रको संघर्ष र जागरणलाई विशेष महत्व दिए । ‘मधेशजस्तो क्षेत्र, जहाँ विभिन्न समुदायहरू वर्षौंदेखि उत्पीडनमा थिए, अहिले जागिसकेका छन् । तिनलाई अब छलकपट गरेर दबाउन कठिन छ,’ उनले भने, ‘लोकतन्त्रको रक्षा र देशलाई सही मार्गमा अघि बढाउन सबैले एकजुट हुनु जरुरी छ ।’

भ्रष्टाचारको सन्दर्भमा उनले प्रस्ट धारणा राख्दै भने, ‘राजा र राणाहरूको पालामा तीन गुणा बढी भ्रष्टाचार हुन्थ्यो । तर, उनीहरू आफ्नो कुटिलताले गलत कामहरू जनतासम्म पुग्नै दिँदैनथे । त्यसबेला जनतालाई शिक्षित हुनबाट वञ्चित गराइयो ।’

भट्टराईले वर्तमान समयको शिक्षाको महत्व उल्लेख गर्दै भने, ‘आज जनताले पढ्न र लेख्न पाएका छन् । केही क्षेत्रमा अझै शिक्षा विस्तार आवश्यक छ । तर, त्यो बेलामा त आधारभूत शिक्षा पनि सीमित व्यक्तिहरूसम्म मात्र सीमित थियो । राजाहरूले आफ्नो सत्ता सुरक्षित राख्नका लागि मात्र केही विद्यालय खोलेका थिए ।’

डा. भट्टराईले राजनीतिक र आर्थिक सुधारका लागि सबैलाई एकजुट भएर अघि बढ्न आह्वान गर्दै राजतन्त्रको कल्पनाबाट मुक्त भएर वास्तविक क्रान्तिको बाटोमा लाग्न आग्रह गरे ।