जनकपुरधाम, ९ चैत । नेपाली कांग्रेसका वरिष्ठ नेता तथा सांसद विमलेन्द्र निधिले पूर्वराजा ज्ञानेन्द्र शाहलाई गणतन्त्रको स्थायित्व र जनताको म्यान्डेटबारे स्पष्ट सन्देश दिएका छन् । हालैका दिनमा पूर्वराजा र राजतन्त्र समर्थकहरूको बढ्दो सक्रियतालाई सम्बोधन गर्दै निधिले नेपालमा राजतन्त्र फर्किन अब सम्भव नभएको दाबी गरेका छन् ।

शनिबार जनकपुरधाममा आयोजित महावीर युवा कमिटीको नवनिर्वाचित कार्यसमितिको सपथ ग्रहण तथा पद हस्तान्तरण कार्यक्रममा प्रमुख अतिथिको आसनबाट बोल्दै निधिले गणतन्त्र नेपालको जग बलियो रहेको र यसलाई कुनै पनि परिस्थितिमा डगमगाउन नदिइने अडान व्यक्त गरे ।

उनले भने, ‘नेपालमा राजतन्त्र र राणाशाहीको पुनस्र्थापना असम्भव छ । राजा अपदस्त मात्रै होइन, जनताले अस्वीकार गरिसकेका छन् ।’ निधिले पूर्वराजालाई आफ्नै सीमा बुझ्न चेतावनी दिँदै गणतन्त्रलाई जनताको इच्छाअनुसार नै अगाडि बढाउनुपर्ने धारणा राखे ।

नेपालको गणतन्त्र स्थापनाको सन्दर्भमा उनले नेपालका प्रथम राष्ट्रपति डा. रामवरण यादवको भूमिका स्मरण गरे । निधिले भने, ‘यो जनकपुरधाम डा. रामवरण यादवको जिल्ला, जहाँबाट गणतन्त्रको जग ठडिएको हो । त्यसैले गणतन्त्र नेपालको भविष्य उज्ज्वल छ र यसको स्थायित्व सुनिश्चित छ ।’

नेता निधिले तत्कालीन राजाहरूमा पृथ्वीनारायण शाहलाई विशेष सम्मान दिनुपर्ने उल्लेख गरे । ‘नेपालको एकीकरण पृथ्वीनारायण शाहकै नेतृत्वमा भएको हो । त्यसैले उनलाई सम्मान गरिन्छ,’ उनले भने, ‘तर पछि राजाहरू र प्रधानमन्त्रीहरूमा शक्ति मोह बढ्दै जाँदा मुलुकको राजनीतिक अवस्था बिग्रियो ।’

गणतन्त्रलाई अस्थिर पार्ने कुनै पनि प्रयास विफल हुने निधिको दाबी थियो । उनले राजतन्त्र समर्थकलाई गणतन्त्रको मर्म बुझ्न र वर्तमान राजनीतिक संरचनामा आफूलाई समायोजन गर्न सुझाव दिए ।