जनकपुरधाम, ९ चैत । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले देशको उन्नतिका लागि वर्तमान संघीय लोकतान्त्रिक गणतन्त्रात्मक व्यवस्थालाई परिवर्तन गर्नु अपरिहार्य भएको बताएका छन् ।

राप्रपाले शनिबार जनकपुरधाममा आयोजना गरेको विरोध सभामा बोल्दै लिङ्देनले वर्तमान व्यवस्थाले मुलुकलाई बर्बादीको दिशामा धकेलिरहेको र यसलाई समयमै परिवर्तन नगरे देशलाई ठूलो क्षति हुने चेतावनी दिएका हुन् ।

लिङ्देनका अनुसार नेपाललाई संकटबाट जोगाउन राजतन्त्रको पुनस्र्थापना गरी प्रत्यक्ष निर्वाचित कार्यकारी प्रधानमन्त्रीको व्यवस्था नै उपयुक्त हुनेछ । उनले राजा अभिभावकको भूमिकामा रहनुपर्ने र संसदमा पूर्ण समानुपातिक प्रणाली लागू गर्नुपर्ने प्रस्ताव गरे । साथै, उनले सांसदहरुलाई मन्त्री नबनाई उनीहरुलाई केवल ऐन तथा कानून बनाउने जिम्मा दिइनुपर्ने बताए । यसले गर्दा भ्रष्टाचार घटाउन मद्दत पुग्ने उनको दाबी थियो ।

उनले भने, ‘देशमा महँगी असह्य भएको छ । भ्रष्टाचारले सीमा नाघेको छ । राजतन्त्रसहितको प्रत्यक्ष निर्वाचित प्रधानमन्त्री र संघीय व्यवस्थाको अन्त्यले भ्रष्टाचार स्वतः निर्मूल हुनेछ ।’

लिङ्देनले कांग्रेस, एमाले, माओवादी तथा मधेशवादी दलहरुमा आवद्ध नेताहरुमाथि जनताको मतको दुरुपयोग गरेको आरोप लगाए । उनले नेपाली जनताको आस्थाको विरुद्धमा गएर धर्मनिरपेक्षताको नाममा हिन्दु धर्ममाथि हमला गरिरहेको आरोप लगाउँदै ती दलहरुले हिन्दु धर्मावलम्बी जनताको विश्वासको दुरुपयोग गरेको तर्क प्रस्तुत गरे ।

‘मधेशलाई संघीयता सबै समस्याको समाधान हो भन्ने भ्रम थियो । तर, अहिले मधेसी जनताले पनि त्यो भ्रम चिर्दैछन्,’ लिङ्देनले भने ।

संघीयता देशको अर्थतन्त्रलाई कमजोर बनाउने र नेपालीबीच विभाजनको रेखा कोर्ने अस्त्र भएको उनको दाबी थियो ।