जनकपुरधाम, ८ चैत । जनकपुरधाममा शनिबारदेखि टि–२० क्रिकेट प्रतियोगिता आरम्भ हुने भएको छ ।

राजर्षि जनक क्याम्पसको आयोजना र जिल्ला क्रिकेट संघ धनुषाको संयोजनमा सुरु हुने यस प्रतियोगिताले शारीरिक स्वास्थ्य र मानसिक विकासमा युवाहरूको ध्यान केन्द्रित गर्ने लक्ष्य राखेको आयोजकको भनाइ छ ।

यस प्रतियोगिताको उद्देश्य मात्र खेलकुदको प्रोत्साहन नभई युवाहरूलाई लागु पदार्थको प्रभावबाट बचाउन र स्वस्थ जीवनशैलीमा प्रोत्साहित गर्नु हो । जनकपुर पेस फाउण्डेशनको सहयोगमा हुने प्रतियोगिता युवाहरूको शारीरिक र मानसिक विकासमा महत्वपूर्ण योगदान पुर्याउने विश्वास गरिएको छ ।

प्रतियोगिता जनकपुरधामको रामजानकी बहुउद्देश्यीय रङ्गशालामा आयोजित हुनेछ । यो प्रतियोगिता १३ चैतसम्म चल्नेछ । यस प्रतियोगितामा कक्षा ११ देखि स्नातकोत्तरसम्मका विद्यार्थीहरूले सहभागी हुनेछन् ।

राजर्षि जनक क्याम्पसका विद्यार्थीहरू र अन्य शैक्षिक संस्थाका विद्यार्थीहरूलाई शारीरिक स्वास्थ्य र मानसिक फिटनेसको महत्त्व बुझाउने उद्देश्यले यो प्रतियोगिता आयोजना गरिएको हो । प्रतियोगिता युवाहरूको उत्साह, सक्रिय र स्वस्थ जीवनशैलीको प्रवद्र्धन गर्ने एक उत्कृष्ट प्लेटफर्मको रूपमा लिइएको छ ।

प्रतियोगितामा कुल सात कलेजका विद्यार्थीहरूले प्रतिस्पर्धा गर्नेछन् । सहभागी कलेजहरूमा राजर्षि जनक क्याम्पस, गोगल प्रसाद उच्च मावि बसहिया, राराव क्याम्पस, जनकपुर कम्युनिटी कलेज, मिट क्याम्पस र मोनाष्टिक कलेज छन् । प्रत्येक टोलीलाई लीग चरणमा प्रतिस्पर्धा गर्ने अवसर प्रदान गरिनेछ ।

प्रतियोगितामा कुल ९ लाख रुपैयाँको खर्च अनुमान गरिएको छ । विजयी टिमलाई मेडल, शिल्ड र प्रमाणपत्र प्रदान गरिने छ । यो प्रतियोगिता युवाहरूलाई मानसिक स्वास्थ्य र शारीरिक फिटनेसको महत्त्व बुझाउने एक राम्रो अवसर भएको जनाइएको छ ।

नेपाल क्रिकेट संघ धनुषाका जिल्ला सचिव आशिष झाले भने, ‘यो प्रतियोगिता युवाहरूको शारीरिक र मानसिक स्वास्थ्यको लागि राम्रो प्लेटफर्म हो । यसले खेलकुदको महत्त्व र शारीरिक फिटनेसलाई प्रवद्र्धन गर्नेछ ।’