काठमाडौं, ८ चैत । लोकतान्त्रिक समाजवादी पार्टी (लोसपा) नेपालले आफ्नो सरकारका मन्त्रीहरूलाई जनअपेक्षाअनुसार सुशासन र जनहितका काम गर्न निर्देशन दिएको छ । पार्टीको सम्पन्न सचिवालय बैठकमा सरकारको आलोचना भइरहेको र त्यसको सुधारको आवश्यकता औंल्याइएको हो ।

पार्टीका महासचिव डा. सुरेन्द्र झाले बैठकमा मधेश प्रदेशमा सरकारप्रति असन्तुष्टि बढिरहेको भन्दै त्यसलाई सम्बोधन गर्न पार्टीका नेताहरू र कार्यकर्ताहरुलाई सचेत गराएका छन् । उनले भने, ‘पार्टीका मन्त्री र नेताहरूलाई जनहितका काममा कडा निगरानी राखेर जनअपेक्षालाई पुरा गर्नका लागि अघि बढ्न निर्देशन दिएको छ ।’

बैठकमा राष्ट्रको प्रमुख मूल्य—गणतन्त्र र धर्मनिरपेक्षतालाई जोगाउनका लागि पार्टीका नेता र कार्यकर्तालाई सचेत रहन पनि निर्देशन दिइएको छ । यससँगै, पार्टीको आगामी रणनीति र संगठनात्मक कामलाई प्रभावकारी बनाउन चैत १७ गतेसम्म वडा तथा पालिका समितिको अधिवेशनको समय थप गरिएको छ ।

साथै, पार्टीको संगठन विस्तार र संरचना मजबुत बनाउन कोशी र बागमती प्रदेशमा संरचना अध्ययन गर्नका लागि दुई समिति गठन गर्ने निर्णय पनि लिइएको छ ।

पार्टीको बैठकमा नेताहरू, मन्त्रीहरू, सांसदहरू र राजनीतिक नियुक्ति पाएकाहरूलाई तोकिएको समयसीमा भित्र आफ्नो जिम्मेवारी पूरा गर्न निर्देशन दिइएको छ ।