सिरहा, ८ चैत । सिरहाका प्रमुख जिल्ला अधिकारी बासुदेव दाहाललाई गृह मन्त्रालयले फिर्ता बोलाएको छ । उनको स्थानमा कपिलवस्तुका प्रमुख जिल्ला अधिकारी विश्वप्रकाश अर्याललाई सिरहा पठाइएको गृह मन्त्रालयले जनाएको छ । दाहालको स्थानान्तरण विष्णु महायज्ञ आयोजनासम्बन्धी विवादको कारण भएको बताइएको छ ।

सिरहाको औरही गाउँपालिका–५ मा महायज्ञ आयोजना गर्नका लागि दलित परिवारको घर भत्काइएको विषयमा विवाद उठेको थियो । यस घटनामा जनमत पार्टीका गाउँपालिका समिति अध्यक्ष दिलिप यादव र गाउँपालिका अध्यक्ष शिवजी यादवको संलग्नता रहेको आरोप लगाइएको छ ।

महायज्ञको तयारीका लागि जेसीबी प्रयोग गरेर दलित परिवारका सदस्य दिपक मल्लिकको घर भत्काइएको थियो । यस घटनामा पीडित परिवारका सदस्यहरूले घर भत्काइएपछि जबरजस्ती अन्यत्र सर्न बाध्य पारिएको बताएका छन् ।

पीडित दिपकका श्रीमती अनिताले भनिन्, ‘हामी वर्षौंदेखि बस्दै आएको घर भत्काएर जबरजस्ती स्थानान्तरण गराउन बाध्य पारियो ।’ अहिले सो स्थानमा महायज्ञको तयारी भइरहेको छ । यस घटनामा गृहमन्त्री रमेश लेखकले स्वतन्त्र छानबिन गर्नका लागि प्रहरीलाई निर्देशन दिएका छन् ।

गृहमन्त्रीको निर्देशन पछि घटना सत्यतथ्य पत्ता लगाउनका लागि गृह मन्त्रालयले कार्यवाही सुरु गरेको हो । साथै, समाचार सार्वजनिक भएपछि पीडित परिवारलाई गाउँपालिका अध्यक्ष शिवजी यादव र जनमत पार्टीका नेता दिलिप यादवका समर्थकहरूले धम्की दिन थालेको आरोप पनि लगाइएको छ ।

गृह मन्त्रालयले सिरहामा भएको विवाद र सरकारी अधिकारीको स्थानान्तरणका विषयमा थप अनुसन्धान गरिरहेको छ । स्थानिय प्रशासनको निर्णय र कार्यसम्पादनमा भइरहेका समस्याले सिरहामा थप अस्थिरता सिर्जना गरेको छ ।