जनकपुरधाम, ७ चैत । जनमत पार्टीका अध्यक्ष डा. सीके राउतले पार्टीका नेता तथा कार्यकर्ताहरुलाई विकास निर्माणका योजना र सरुवा–बढुवाका लागि आफूलाई फोन नगर्न आग्रह गरेका छन् ।

मधेश प्रदेशमा जारी योजनासम्बन्धी विवादको बीचमा राउतले स्पष्ट सन्देश दिँदै फेसबुकमा यस्तो बताएका हुन् ।

राउतले भने, ‘हजारौँ योजना छन् । कुन पत्र कहाँ छ भन्ने कुरा पार्टी अध्यक्ष वा पार्टीको जिम्मेवारी होइन ।’ पार्टीका कार्यकर्ताहरूलाई विकास योजनामा हस्तक्षेप नगर्न आह्वान गर्दै उनले भने, ‘पार्टीका कार्यकर्ताहरू बदनाम हुने योजनामा नफसौं ।’

पार्टीका कार्यकर्ताहरूलाई निर्देशन दिँदै राउतले पार्टीको भिजन र एजेन्डा अनुसार काम नगर्ने अवस्था आएमा सरकारबाट बाहिर जाने निर्णय लिन सकिने चेतावनी पनि दिएका छन् ।

उनले मधेश सरकारका मन्त्रीहरूको गतिविधिका लागि बारम्बार पार्टी अध्यक्षलाई फोन नगर्न र सोका लागि सम्बन्धित निकायसँग सम्पर्क गर्न पार्टी कार्यकर्ताहरूलाई स्पष्ट निर्देशन दिएका छन् ।