काठमाडौं, ७ चैत । नेपालका पूर्वराष्ट्रपति डा. रामवरण यादव र विद्या देवी भण्डारीविरुद्ध भ्रष्टाचार गरेको आरोपमा अख्तियार दुरुपयोग अनुसन्धान आयोगमा उजुरी दर्ता गरिएको छ ।

सिन्धुलीका युवराज पौडेल सफलले आज आयोगको केन्द्रिय कार्यालयमा उजुरी पेश गर्दै दुबै पूर्वराष्ट्रपतिले आफ्नो घर हुँदा पनि भाडामा बसेर सरकारी खजाना गुमाएको आरोप लगाएका छन् ।

उनले उजुरीमा डा. रामवरण यादवको काठमाण्डौ उपत्यकामा सुविधा सम्पन्न घर भएपनि उनी भाडामा बसेर मासिक एक लाख ९० हजार रुपैयाँ भाडा राज्यलाई तिर्दै आएको उल्लेख गरेका छन् । यादवले आफ्नो निजी घरमा नबसी भाडामा बसेर सरकारले भाडा तिर्नु भ्रष्टाचारको कार्य रहेको पौडेलको आरोप छ ।

यसैगरी, पूर्वराष्ट्रपति विद्या देवी भण्डारीको पनि काठमाण्डौको चपली हाइटमा आफ्नै घर रहेको र उनी सो घरमा नबसी नेपाल सरकारबाट घर भाडा सुविधा प्राप्त गर्दै मासिक एक लाख रुपैयाँ लिने गरेको तथ्य बाहिर आएको छ । पौडेलले यसलाई पनि भ्रष्टाचारजन्य कसूर ठहर गर्दै भण्डारीविरुद्ध तत्काल कारवाहीको माग गरेका छन् ।

पौडेलले चीन, दक्षिण कोरिया लगायत अन्य देशहरूमा पनि पूर्वराष्ट्रपतिहरूलाई भ्रष्टाचारको आरोपमा पक्राउ गरिएर कानूनी कारवाही गरिएको उजुरीमा भनेका छन् । उनले नेपालमा पनि डा. यादव र भण्डारीलाई पक्राउ गरी अनुसन्धान गर्ने र भ्रष्टाचार निवारण ऐन बमोजिम कडा कारवाही गर्न माग गरेका छन् ।