जनकपुरधाम, ६ चैत । राजर्षि जनक क्याम्पसको आयोजना र जिल्ला क्रिकेट संघ धनुषाको संयोजनमा यही चैत ९ गतेदेखि टि–२० क्रिकेट प्रतियोगिता सुरु हुँदैछ । जनकपुर पेस फाउण्डेशनको सहयोगमा हुने यो प्रतियोगिता केवल एक खेलकुद गतिविधि मात्र नभएर युवाहरूको शारीरिक र मानसिक विकासका लागि एक महत्वपूर्ण कदम हुनेछ ।

जनकपुरधामको रामजानकी बहुउद्देश्यीय रङ्गशालामा हुने यो प्रतियोगिता १३ गतेसम्म चल्नेछ । प्रतियोगितामा कक्षा ११ देखि स्नातकोत्तरसम्मका विद्यार्थीहरूले सहभागिता जनाउन सक्नेछन् । यो कार्यक्रम विशेष गरी युवाहरूलाई लागु पदार्थको असरबाट जोगाउन र शारीरिक स्वास्थ्यको महत्त्व बुझाउन उद्देश्य राखिएको छ ।

सार्वजनिक शिक्षा र खेलकुदमा बढी ध्यान दिनुपर्ने समयमा राजर्षि जनक क्याम्पसको यो पहलले जनकपुरधामका विद्यार्थीहरूलाई एक स्वस्थ, उत्साही र सक्रिय जीवनशैलीतर्फ प्रेरित गर्नेछ ।

प्रतियोगितामा ७ वटा कलेजका विद्यार्थीहरू सहभागी हुनेछन् । राजर्षि जनक क्याम्पस, गुगल प्रसाद उच्च मावि बसहिया, राराव क्याम्पस, जनकपुर कम्युनिटी कलेज, मिट क्याम्पस र मोनाष्टिक कलेजका विद्यार्थीहरूको सहभागिता सुनिश्चित छ ।

प्रतियोगिता अफरमेट अनुसार हुनेछ । प्रत्येक टोलीलाई लीग चरणमा प्रतिस्पर्धा गर्न मौका मिल्नेछ । नेपाल क्रिकेट संघ धनुषाका जिल्ला सचिव आशिष झाले बताए अनुसार यो प्रतियोगिता युवाहरूलाई मानसिक स्वास्थ्य र शारीरिक फिटनेसको महत्त्व बुझाउने राम्रो प्लेटफर्म हो ।

प्रतियोगितामा कुल ९ लाख रुपैयाँको खर्च अनुमान गरिएको छ । विजयी टिमलाई मेडल, शिल्ड र प्रमाणपत्र जस्ता पुरस्कार प्रदान गरिनेछ ।