जनकपुरधाम, ६ चैत । जनकपुरधाम उपमहानगरपालिका वडा नम्बर–३ का वडाध्यक्ष दिपेन्द्र साह र महेन्द्र मेडिकलका सञ्चालक मनोज कुमार साह बीच मापदण्ड उल्लंघनको विषयमा विवाद चर्किएको छ ।

वडाध्यक्ष साहले गोयन्का टोलमा रहेको महेन्द्र मेडिकलको नवनिर्मित भवन मापदण्ड बिपरीत रहेको र यसको सम्बन्धमा जनकपुरधाम उपमहानगरपालिकामा मुद्दा दायर गरेको बताएका छन् ।

वडाध्यक्ष साहका अनुसार महेन्द्र मेडिकलको भवनका निर्माण कार्यमा मापदण्डको उल्लंघन भएको छ । उनले भने, ‘नक्साअनुसार भवनको सेट ब्याक ५ फिट छोड्नुपर्ने थियो । तर, त्यहाँ सिढी निर्माण गरिएको छ । यसका कारण निर्माण कार्य मापदण्डसँग मेल खाँदैन ।’ यस विवादका कारण उपमहानगरपालिका न्यायिक समितिमा मुद्दा दायर गरिएको र समितिको निर्णयबाट वडाध्यक्ष साह असन्तुष्ट भएका छन् ।

वडाध्यक्ष साहले जनकपुरधामका जनसमुदायको समर्थनको महत्त्वपूर्ण भूमिका रहेको बताए । उनले जनसमुदायको आज बसेको बैठकले मापदण्ड बिपरीत कुनै पनि निर्माण कार्य नगर्नु पर्ने निर्णय गरेको र यसले उनलाई थप बल दिएको पनि उल्लेख गरे ।

‘महेन्द्र मेडिकलका सञ्चालक मनोज कुमार साहले ४० फिट उचाइको भवन बनाएका छन् । यो मापदण्ड बिपरीत छ । यसलाई हामी थप गम्भीरतासाथ लिइरहेका छौं,’ साहले थपे ।

महेन्द्र मेडिकल प्रालिको नाममा दर्ता रहेको वडा नम्बर–३ स्थित सिट नम्बर १३९५–०५ र १३५५–२५ को कित्ता नम्बर ६६ र २२६ को ०–०–०–२.५ र ०–०–१०३ जग्गा २०८० चैत ७ गते नक्सा पास गरेविपरीत घर निर्माण र सेट ब्याक ५ फिट नछाडेर निर्माण गरिरहेको भन्दै वडा कार्यालयले मुद्दा दिएको थियो ।

यता, महेन्द्र मेडिकलका सञ्चालक मनोज कुमार साहले वडाध्यक्ष साहको आलोचनालाई व्यक्तिगत आरोपका रूपमा लिएका छन् । उनले वडाध्यक्ष साहमाथि आरोप लगाउँदै भने, ‘मैले आफ्नो भवन निर्माण गर्न सबै प्रक्रिया पुरा गरेको छु । मैले घरको चारकिल्ला प्रमाणित गर्न आग्रह गर्दा वडाध्यक्षले मेरो व्यक्तिगत इज्जतलाई चोट पुर्याउने प्रयास गरेका छन् ।’

मनोजले वडाध्यक्ष साहमाथि अर्को गम्भीर आरोप पनि लगाए । उनले भन, ‘वडाध्यक्ष साहको आफ्नै निर्माण गरिएको घर मापदण्ड बिपरीत छ । उनले लालपूर्जा नै नभएको जग्गामा वडा नम्बर–२ मा आफ्नो घर निर्माण गरेका छन् ।’

यस विवादलाई समाधान गर्न जनकपुरधाम उपमहानगरपालिकाले छानबिन समिति गठन गरेको छ । वडाध्यक्ष साहले छानबिन समितिको प्रतिवेदनपछि मापदण्ड उल्लंघन गरेको पाएमा कारवाही गरिने बताए ।