काठमाडौं, ५ चैत । काठमाडौंको टोखा नगरपालिका–२ झोरबाट २५ करोड रुपैयाँसहित पक्राउ परेका कुशाङ लामा राजस्व छली र सुन तस्करीमा पूर्वमा ५ वर्ष जेल बसेका थिए । उनलाई गएराति काठमाडौं उपत्यका अनुसन्धान कार्यालयले मालबाहक ट्रकमा २५ करोड १९ लाख २४ हजार ९ सय ५० रुपैयाँ लुकाएर राखिएको अवस्थामा पक्राउ गरेको हो ।

नम्बर प्लेट ना ७ ख १६५२ को मालबाहक ट्रकमा लुकाएर राखिएको रकम बरामद गरिएको थियो । उक्त ट्रकको चालक कुशाङ लामा एक्लै थिए । एसएसपी रमेश बस्नेतका अनुसार लामा सिन्धुपाल्चोकको भोटेकोशी गाउँपालिका–१ का निवासी हुन् ।

पक्राउ परेका लामा संगै विदेशी मुद्राहरू समेत बरामद भएका छन् । अमेरिकी डलर र युरो पनि समावेश रहेको जनाइएको छ । प्रहरीले गाडीको खोजी गर्दा रकम लुकाएर राखिएको स्थान बायाँतिरको फल्स बटमबाट प्राप्त भएको जानकारी दिएको छ ।

एसएसपी बस्नेतका अनुसार कुशाङ लामा पहिले पनि सुन तस्करीको आरोपमा २०७३ पुस १३ गते पक्राउ परेका थिए । उनले ५ वर्ष जेलको सजाय भुक्तान गरेका थिए । त्यसपछि उनी पुनः यसरी ठूलो रकमका साथ पक्राउ परेका हुन् ।

प्रहरीका अनुसार कुशाङ लामा चलाउँदै गरेको मालबाहक गाडी उनकी आमाको नाममा रहेको बताइएको छ । यसबाट उनको पूर्व गतिविधि र आर्थिक लेनदेनको बारेमा थप अनुसन्धान अघि बढाइएको छ ।

लामाले पहिलेको घटनामा पनि सुन तस्करीको संलग्नता स्वीकार गरेका थिए । उनले अब यो घटनामा के कति जोडिएका छन् भन्ने स्पष्टतासाथ छानबिन प्रक्रिया जारी रहेको छ ।