जनकपुरधाम, ५ चैत । धनुषाको मिथिला नगरपालिका–८ जमुनिवासमा ३५ वर्षीय पुरुषको शव इनारभित्र फेला परेको छ । सो शव मृतक नारायण घिसिङको भएको पुष्टि भएको छ । उनको परिवारले उनी चार दिनदेखि हराएको जानकारी दिएका थिए ।

घटनाबारे जानकारी दिँदै इलाका प्रहरी कार्यालय ढल्केबरका प्रहरी निरीक्षक जटाशङ्कर यादवले भने, ‘सोमबार साँझ शवको विषयमा जानकारी प्राप्त भयो । तर, अन्ध्यारो र कठिन परिस्थितिको कारण शवलाई इनारबाट निकाल्न सकिएको थिएन । मङ्गलबार बिहान सशस्त्र प्रहरीको सहयोगमा शवलाई इनारबाट बाहिर निकालियो ।’

शव निकालेर पोष्टमार्टमका लागि महोत्तरीको बर्दिवास अस्पताल पठाइँदा प्रहरीले मृत्युको कारण खुल्न नसकेको जानकारी दिएका छन् । प्रहरी निरीक्षक यादवले भने, ‘मृत्युको कारण र घटनाबारे हाल यकिन गर्न सकिएको छैन । पोष्टमार्टम रिपोर्टले मात्र वास्तविक कारण खुलाउनेछ । यसमा अनुसन्धान भइरहेको छ ।’

मृतक घिसिङका पिता काजीसिंह घिसिङले भने, ‘मेरो छोरा चार दिनदेखि हराएको थियो । मैले आफन्त र चिनेजानेका व्यक्तिहरूसँग फोन गरेर खोजी गरिरहेको थिएँ । सोमबार साँझ घरका केटाकेटीहरूले इनार नजिक दुर्गन्ध महसुस गरेपछि इनारको निरीक्षण गर्दा मानिसको हातखुट्टा देखिएको थियो, त्यसपछि प्रहरीलाई खबर गरे ।’

मृतकको शङ्कास्पद मृत्युको कारणको अनुसन्धानलाई तीव्रता दिइएको छ ।