जनकपुरधाम, ४ चैत । समाजसेवा र नगर विकासप्रति समर्पित धनुषाका एक युवा व्यवसायीले उल्लेखनीय उदारता प्रदर्शन गरेका छन्।

धनुषाधाम नगरपालिका–३ का व्यवसायी तथा समाजसेवी सूर्यनाथ यादवले नेपाल विद्युत प्राधिकरण धनुषाधाम शाखाको कार्यालय स्थापनाका लागि दुई कठ्ठा बहुमूल्य जग्गा निशुल्क प्रदान गरेका हुन्।

धनुषाधाम नगरपालिका–३ मा रानी दुग्ध डेरी उद्योग सञ्चालन गर्दै आएका यादवले प्राधिकरणका धनुषाधाम शाखा प्रमुख रोशन कुमार सिंहलाई औपचारिक रूपमा जग्गाको लालपुर्जा हस्तान्तरण गरेका हुन्।

यादवका अनुसार धनुषाधाम नगर विकासको दिशामा अघि बढिरहेको सन्दर्भमा आफ्नातर्फबाट सानो भए पनि योगदान दिन सकियोस् भन्ने उद्देश्यले यो निर्णय गरिएको हो।

नगरको विकासमा सहयोग पुर्‍याउने अभिप्रायले नेपाल विद्युत प्राधिकरणजस्तो महत्वपूर्ण संस्थालाई जग्गा प्रदान गर्न आफू लामो समयदेखि इच्छुक रहेको उनले बताए।

नेपाल विद्युत प्राधिकरण धनुषाधाम शाखा स्थापनाकालदेखि नै भाडाको घरमा कार्यालय सञ्चालन गर्दै आएको थियो। अब आफ्नै जग्गा प्राप्त भएसँगै कार्यालयको भौतिक संरचना निर्माणको बाटो खुलेको छ।

शाखा प्रमुख रोशन कुमार सिंहका अनुसार पहिलो चरणमा परिसरको चारैतर्फ पर्खाल लगाइनेछ भने आगामी आर्थिक वर्षमा कार्यालय भवन निर्माण प्रक्रिया थालिनेछ।

यादवले दान गरेको जग्गा धनुषाधाम नगरपालिकाको मुख्य चौकमा रहेको छ । यसको बजार मूल्य हाल ५० लाख रुपैयाँ हाराहारी रहेको बताइएको छ।

युवा व्यवसायीको यस किसिमको उदारताले नगरविकास, विद्युत सेवा सुदृढीकरण तथा समाजसेवाको उज्ज्वल उदाहरण प्रस्तुत गरेको छ। यसले अन्य व्यवसायी तथा समाजसेवीहरूलाई पनि समाजप्रति योगदान दिन प्रेरित गर्ने विश्वास नगरवासीहरूले व्यक्त गरेका छन्।