काठमाडौँ, २९ फागुन । विपक्षी चारदलीय समाजवादी मोर्चाको बैठक शुक्रबार नेकपा एकीकृत समाजवादीको आलोकनगरस्थित कार्यालयमा बस्ने तय भएको छ ।

मोर्चाका कार्यदल सदस्य तथा नेपाल समाजवादी पार्टी (नेसपा) का सहअध्यक्ष गङ्गानारायण श्रेष्ठका अनुसार बैठक दिउँसो ३ बजे सुरु हुनेछ ।

श्रेष्ठले जानकारी दिएअनुसार बैठकको मुख्य उद्देश्य चैत १५ गते काठमाडौँमा आयोजना हुन लागेको विरोध सभाको तयारी गर्नु हो । यसअघि चैत ९ गते जनकपुरधाममा गर्ने भनिएको विरोध सभा स्थगित गरिएको छ ।

श्रेष्ठले भने, ‘विरोध सभाको तयारीमा जुट्नुपर्ने भएकाले चैत ९ गते जनकपुरधाममा राखिएको विरोध सभा स्थगित गरिएको हो ।’

मोर्चाले चैत २ गते बिहान बौद्धिक वर्गसँग अन्तक्र्रिया आयोजना गर्नेछ भने दिउँसो १ बजे पत्रकार सम्मेलन गर्ने योजना बनाएको छ ।

मोर्चाले हालसालै सरकारको आलोचना गर्दै प्रतिगामी शक्तिहरूको प्रभावले व्यवस्था माथि खतरा बढेको निष्कर्ष निकालेको थियो ।

फागुन २५ गते त्रिभुवन अन्तर्राष्ट्रिय विमानस्थलमा पूर्वराजा ज्ञानेन्द्र शाहको स्वागतका लागि ठूलो संख्यामा मानिसहरू जम्मा भएपछि मोर्चाले त्यसलाई व्यवस्थामाथि चुनौतीको रूपमा लिएको छ ।

फागुन २७ गते बसेको मोर्चाको बैठकले केपी ओली नेतृत्वको गठबन्धन सरकारको कारण राजावादी शक्तिहरू सडकमा सक्रिय भएको निष्कर्ष निकालेको थियो ।

नेताहरूका अनुसार चैत १५ गते काठमाडौँमा हुने विरोध सभा प्रतिगामी शक्तिलाई केन्द्रबाट कडा चुनौती दिने उद्देश्यले आयोजना गरिएको हो ।

मोर्चाले जनतालाई जागरुक बनाउँदै सरकारको क्रियाकलापप्रति आफ्नो असन्तुष्टि जनाउन काठमाडौँमा व्यापक विरोध प्रदर्शनको तयारी गरेको छ ।