काठमाडौँ, २७ फागुन । स्वतन्त्र सांसद अमरेशकुमार सिंहले नेपाली कांग्रेस र नेकपा (एमाले) का नेताहरूलाई लोकतन्त्रका लागि खतरा भएको आरोप लगाएका छन् ।

प्रतिनिधि सभाको मंगलबारको बैठकमा बोल्दै उनले कांग्रेस र एमालेलाई देश लुट्नमा संलग्न रहेको र लोकतन्त्रको नाउँमा नेतातन्त्र चलाइरहेको दाबी गरेका हुन् ।

सांसद सिंहले भने, ‘नेपाली जनता लोकतन्त्रप्रेमी रहन्छ । तर, लोकतन्त्रको नाउँमा अहिले नेतातन्त्र चलिरहेको छ । नेताहरूको संरक्षणमा बिचौलिया र भ्रष्टाचारीहरू संरक्षित छन्। अहिले नेपालमा लोकतन्त्र छैन, नेतातन्त्र छ ।’

उनीले थपे, ‘कांग्रेस र एमालेले राजावादी देखाएर देश लुटिरहेका छन् । त्रिभुवन विश्वविद्यालयमा राजावादीले रेक्टरको कुर्सी तोडेका छन् । कांग्रेस र एमालेका कार्यकर्ताले भनेका छन् ।’

सिंहले आफूले भर्खरै एउटा महामन्त्रीको उपदेश सुनेको उल्लेख गर्दै भनें, ‘उहाँ दक्षिण भारतीय फिल्मको शैलीमा दुई–चार सय गाडी लिएर कहिले वीरगञ्ज पुग्नुहुन्छ, कहिले सिमरा, कहिले सिन्धुली पुग्नुहुन्छ । यस्तो लोकतन्त्र हो ? बिचौलिया, दलाल र तस्करले दुई सय गाडीको व्यवस्था गर्नसक्छ, कुनै नेपाली जनताले होइन ।‘ उनले यस्ता महामन्त्रीहरूबाट लोकतन्त्रको लागि खतरा रहेको दाबी गरे ।

सांसद सिंहले कांग्रेस र एमालेका नेताहरूसँग देशको विकास र जनताको भलाईको बारेमा प्रश्न गर्दै भने, ‘जनताले कुलमानलाई दुःख दिने, त्रिभुवन विश्वविद्यालयको जग्गा कब्जा गर्ने, ललिता निवासको जग्गा कब्जा गर्ने कुरा सोधिरहेका छन् । लोकतन्त्रको नाममा १८ वर्ष विभिन्न पदमा पुगेका नेता नै यसको रक्षामा उत्रनुपर्ने हो ।’

उनले कांग्रेस र एमालेका नेताहरूमाथि गम्भीर आरोप लगाउँदै थपे, ‘हामी त लोकतन्त्रको रक्षाका लागि लास्ट लाइन अफ डिफेन्स हो । न हामीले जनता लुटेका छौं, न लुट्नेवाला छौं । जसले लुटेर उपदेश दिइराख्नुभएको छ । आज फेरि राजावादी देखाएर देश लुट्न पाइँदैन ।’

सिंहले कांग्रेस र एमालेलाई आरोप लगाउँदै भने, ‘तपाईंहरूले देश लुट्नुभयो, देशको २६ खर्ब ऋण बढाइदिनुभयो । त्यसकारण लोकतन्त्र खतरामा छ भने कांग्रेस र एमालेका नेताबाट छ । जनताबाट छैन । नेपालको जनता जहिले लोकतन्त्रको पक्षमा छ ।’

सिंहले कांग्रेस र एमालेलाई वि.सं. २०६१ माघ १९ को दिनको बहुदलको अन्त्यको दिनको स्मरण गर्दै भने, ‘हिजोको दिनमा कांग्रेस र एमालेले बहुदल खाएका थिए । आज गणतन्त्रलाई पनि खाइरहेका छन् । यो यथार्थ हो ।’

सांसद सिंहले भने, ‘अब गणतन्त्रको श्राद्ध नगरिदिनुस्, जनताको पक्षमा काम गरिदिनुस् ।’ सिंहले कांग्रेस र एमालेका नेताहरूको आलोचना गर्दै लोकतन्त्रको रक्षा र देशको विकासका लागि जनताको पक्षमा काम गर्नुपर्ने कुरा जोड दिएका छन् ।