जनकपुरधाम, १८ फागुन । जनकपुरधामस्थित मदर टेरेसा पब्लिक स्कूलको आयोजनामा फागुन २४ गते ६ किलोमिटरको खुल्ला म्याराथन प्रतियोगिता आयोजना हुने भएको छ ।

अन्तर्राष्ट्रिय नारी दिवसको अवसरमा आयोजित यस म्याराथन प्रतियोगिताको उद्देश्य महिला सुरक्षा र पर्यावरण संरक्षणप्रति जनचेतना फैलाउने रहेको बताइएको छ ।

विद्यालयका निर्देशक अभिषेक कुमार चौधरीले पत्रकार सम्मेलनको आयोजना गरि प्रतियोगितामा १६ वर्ष उमेरदेखि माथिका सबै व्यक्ति सहभागिता जनाउन पाउने बताए ।

उनले भने, ‘यो म्याराथन प्रतियोगिता अन्तर्राष्ट्रिय नारी दिवसको सन्देशलाई फैलाउनका लागि एक विशेष अवसर हुनेछ । यसमा महिला हिंसा र वातावरणीय प्रभावबारे जनचेतना जगाउन मद्दत पुग्नेछ ।’

प्रतियोगितामा सहभागिता जनाउने विजेताहरूलाई आकर्षक पुरस्कार प्रदान गरिनेछ । पहिलो स्थान प्राप्त गर्ने प्रतियोगीलाई २१ हजार रुपैयाँ नगद, दोस्रो स्थान प्राप्त गर्नेलाई १५ हजार रुपैयाँ नगद र तेस्रो स्थान प्राप्त गर्ने प्रतियोगीलाई ११ हजार रुपैयाँ नगदसहित प्रमाणपत्र प्रदान गरिने जानकारी चौधरीले दिए ।

विद्यालयका प्रधानाध्यापक डा. भरत जोशीले महिला हिंसामा कमी र वातावरणीय संकटका कारण जनचेतना फैलाउनका लागि यो म्याराथन प्रतियोगिता आयोजना गरिएको बताए ।

उनले भने, ‘विगतका केही समयदेखि महिला हिंसाका घटनाहरू बढिरहेको र वातावरणीय असन्तुलनका कारण मानवता र पृथ्वीमा नै संकटको अवस्था आएको छ । यस अवसरमा हामीले यस बारेमा जागरूकता फैलाउने प्रयास गरेका छौं ।’

म्याराथनको मार्ग भानु चोकबाट सुरु भएर कदन चोक, मुरली चोक, जीरोमाइल, रामानन्द चोक, हस्पिटल रोड, जानकी चोक हुँदै जनक चोक र शिव चोकबाट पुनः भानु चोकमा समाप्त हुनेछ ।

यो प्रतिस्पर्धा सम्पूर्ण जनकपुरधामलाई एक जुट पार्ने र स्वास्थ्यका साथै सामाजिक उद्देश्यका लागि महत्वपूर्ण अवसर हुने आयोजकको अपेक्षा छ । आयोजकले सबैलाई यो म्याराथन प्रतियोगितामा सहभागिता जनाउनका लागि आह्वान गरेको छ ।