जनकपुरधाम, १५ फागुन । मधेश प्रदेशका मुख्यमन्त्री सतिशकुमार सिंहले जनकपुरधाममा निर्माण हुने रामजानकी अन्तर्राष्ट्रिय बहुउद्देश्यीय रंगशालाको काममा ढिलाइ भएको स्वीकार गर्दै कानूनी प्रक्रियामा रहेका विभिन्न जटिलताहरूले काममा असर पुर्याएको बताएका छन् ।

उनले रंगशालाको निर्माणमा देखिएका समस्या र प्रक्रिया विस्तार गर्दै आगामी दिनमा काम अगाडि बढाउने आशा व्यक्त गरेका हुन् ।

मुख्यमन्त्री सिंहले जनकपुरधाममा रंगशालाको निर्माण कार्य हालसम्म ढिलो भएको कारणबारे जानकारी दिँदै भने, ‘पहिला यो प्रोजेक्ट राष्ट्रिय खेलकुद परिषद्मा दर्ता गरिएको थियो । तर, पछि त्यो प्रक्रिया रद्द गरेर गुठी संस्थानमा आएको छ । यस क्रममा केही कानूनी लफडाका कारण काममा ढिलाइ भएको हो ।’ उनले थपे, ‘१९ गते बोर्डबाट पास भएको जानकारी प्राप्त भएको छ । अब डीपीआर तयार भएकोले तुरुन्तै मन्त्रीपरिषदको निर्णयमा अघि बढ्ने हाम्रो तयारी छ ।’

मुख्यमन्त्री सिंहले २०२२ को पुष महिनामा नै राष्ट्रिय खेलकुद परिषद र गुठी संस्थानसँग सम्झौता गरिसकेको र अब पास भएपछि मन्त्रीपरिषदबाट निर्णय गरेर प्रक्रिया अगाडि बढाइने जानकारी दिए ।

‘हामीले हाम्रो टाइमलाइन अनुसार अहिलेसम्म टेन्डरसमेत गर्नुपर्ने थियो । तर, कानूनी प्रक्रिया र प्राविधिक त्रुटीका कारण ढिलाइ भएको हो,’ उनले भने ।

मुख्यमन्त्री सिंहले भारतका प्रधानमन्त्री नरेन्द्र मोदीद्वारा जनकपुरधामको विकासका लागि घोषणा गरिएको १ अर्ब रुपैयाँको रकम अहिलेसम्म खर्च नभएको बताउँदै सो रकमलाई अब रंगशाला निर्माणमा लगाउने तयारी भइरहेको बताए ।

‘प्रधानमन्त्री मोदीले घोषणा गरेको १ अर्ब रकम रंगशाला निर्माणमा प्रयोग गरिनेछ र थप १ अर्ब रुपैयाँ प्रदेश सरकारबाट लगानी गरिनेछ,’ उनले जानकारी दिए ।

रंगशालाको निर्माणको लागि कुल लागत लगभग साढे २ देखि ३ अर्ब रुपैयाँसम्म हुने उनले जानकारी दिए । यस रंगशाला निर्माणले जनकपुरधामको खेलकुदको वातावरणलाई सुदृढ पार्ने र यस क्षेत्रको विकासमा ठूलो योगदान पुर्याउने आशा गरिएको छ ।