काठमाडौं, ११ फागुन । नेकपा माओवादी केन्द्रका सांसद माधव सापकोटाले प्रधानमन्त्री केपी शर्मा ओलीको राजीनामा माग गरेका छन् ।

आइतबार प्रतिनिधि सभा बैठकको विशेष समयमा बोल्दै सापकोटाले नेपाल अन्तर्राष्ट्रिय संस्था फाइनान्सियल एक्सन टास्क फोर्स (एफएटीएफ) को ग्रे लिस्टमा पर्नु सरकारको ठूलो असफलता भएको भन्दै प्रधानमन्त्री ओलीले मार्गप्रशस्त गर्नुपर्ने माग गरेका हुन् ।

सापकोटाले सरकारको अकर्मण्यता र वित्तीय क्षेत्रमा सुधार गर्ने अठोटको अभावका साथै सुशासनप्रतिको उपेक्षाका कारण नेपाल लज्जाजनक अवस्थामा पुगेको बताए ।

उनले भने, ‘यस घटनाले सरकार सम्पूर्ण रूपमा असफल भएको सङ्केतका रूपमा लिनुपर्नेछ ।’

सापकोटाले सरकारले नैतिक रूपमा मार्गप्रशस्त गर्दै राजीनामा दिनुपर्ने धारणा राखेका छन् ।

उनले सरकारप्रति विश्वास र भरोसा नरहेकाले नेपालको इज्जत र प्रतिष्ठाको रक्षाका लागि प्रतिनिधि सभा गम्भीरतापूर्वक कदम उठाउनुपर्ने आवश्यकता रहेको बताए ।