एजेन्सी, ११ फागुन । चीनमा चमेरोबाट फैलिएको नयाँ कोरोना भाइरसको पहिचान गरिएको छ । वैज्ञानिकहरूले यसको नामा ‘एचकेयू ५–कोभ २’ दिएका छन् ।

यो भाइरस मर्स कोरोना भाइरससँग सम्बन्धित रहेको बताइएको छ । तर, यसले मानवमा कति ठूलो खतरा उत्पन्न गर्न सक्छ भन्ने कुरा अझै स्पष्ट भइसकेको छैन । यस नयाँ भाइरसको संक्रमण पशुबाट मान्छेमा सर्न सक्ने क्षमता के कति छ भन्ने विषयमा थप अनुसन्धान आवश्यक रहेको विशेषज्ञहरूको भनाइ छ ।

वुहान इन्स्टिच्युट अफ भाइरोलोजीका वैज्ञानिकहरूले एचकेयू ५–कोभ २ का बारेमा गरेका अध्ययन अनुसार यसले मानवको शरीरको कोशिकामा प्रवेश गर्न सक्छ । जसरी कोभिड–१९ कोरोना भाइरस (सार्स–कोभ–२) ले शरीरको कोशिकामा प्रवेश गरेको थियो । यो नयाँ भाइरस पनि एस–२ प्रोटिनमार्फत कोशिकामा प्रवेश गर्न सक्षम रहेको वैज्ञानिकहरूको दाबी छ ।

वैज्ञानिकहरूले परीक्षण गर्ने क्रममा यसको प्रभाव मानवको आन्द्रा र श्वासप्रश्वास नलीको कोशिकाहरूमा पाइएको छ । यसले यस भाइरसको क्षति गर्ने क्षमता देखाउँछ । यद्यपि, यसको क्षति गर्ने क्षमता सार्स–कोभ–२ (कोविड–१९) को तुलनामा निकै कम रहेको बताइएको छ ।

यस अनुसन्धानको नेतृत्व चीनकी प्रख्यात भाइरोलोजिस्ट शि झेङलीले गरेकी थिइन् । यसलाई ’ब्याटवुमन’ पनि भनिन्छ । उनी लामो समयदेखि चमेरोबाट फैलिने कोरोनाभाइरसका बारेमा अनुसन्धान गर्दै आएकी छन् ।

एचकेयू ५–कोभ २ को अध्ययन वुहान विश्वविद्यालय, ग्वाङ्झाउ प्रयोगशाला र वुहान इन्स्टिच्युट अफ भाइरोलोजीका वैज्ञानिकहरूको सहकार्यमा गरिएको हो ।

सार्स–कोभ–२ जस्तो भाइरसको तुलनामा एचकेयू ५–कोभ २ मान्छेमा सजिलै फैलिन सक्ने संभावना कम रहेको छ । मिनेसोटा विश्वविद्यालयका संक्रामक रोग विशेषज्ञ माइकल ओस्टरहोमका अनुसार मानव कोशिकासँग यसको सम्बन्ध अझै धेरै कमजोर छ ।

यस नयाँ भाइरसबाट तत्काल कुनै ठूलो खतरा नभएको बताइन्छ । तर, वैज्ञानिकहरूले यसलाई नजरअन्दाज नगरी अध्ययन गर्न आवश्यक रहेको र भविष्यमा यसको फैलावट र प्रभावका बारेमा निगरानी राख्नुपर्ने बताएका छन् ।