एजेन्सी, ११ फागुन । भारतको उत्तर प्रदेशस्थित प्रयागराजमा कुम्भ मेला सम्पन्न गरी फर्किंदै गर्दा भएको एक स्कार्पियो दुर्घटनामा चार नेपालीको मृत्यु भएको छ भने ६ जना गम्भीर घाइते भएका छन् । उक्त दुर्घटना उत्तर प्रदेशको बाँसगाउँ थाना क्षेत्रअन्तर्गत गोरखपुर लिंक रोडमा भएको हो ।

प्राप्त जानकारी अनुसार स्कार्पियो गाडी ट्रयाक्टरको ट्रलिसँग ठोक्किँदा उक्त दुर्घटना घटेको हो । दुर्घटनामा मृत्यु हुने नेपाली नागरिकहरू सप्तरी जिल्लाका छन् । मृतकहरूमा कञ्चनरुप नगरपालिकाका तीन जना छन् ।

कञ्चनरुप नगरपालिका–७ की लिलादेवी चौधरी, कञ्चनरुप–७ का पर्शुराम चौधरी र कञ्चनरुप–५, पिपरा पूर्वका जितु यादवकी श्रीमती हरिहरदेवी यादवको दुर्घटनामा मृत्यू भएको छ । त्यसैगरी, सुनसरीको कुशाहा गाउँपालिका–१ की समतोलिया देवी यादव पनि दुर्घटनामा परी ज्यान गुमाएकी छन् ।

सप्तरीका प्रहरी प्रवक्ता डिएसपी जितेन्द्र वस्नेतले तीन जना मृतकको पहिचान पुष्टि गरेका छन् । दुर्घटनामा ६ जना गम्भीर घाइते भएको उनले जानकारी दिए ।

डिएसपी वस्नेतका अनुसार घाइते हुनेमा शिक्षक उपेन्द्र चौधरी, जितु यादव र अन्य चार जना नेपाली नागरिक छन् । उनीहरूलाई उपचारका लागि गोरखपुरस्थित स्थानीय अस्पतालमा भर्ना गरिएको छ ।

सप्तरी र उदयपुरका विभिन्न नागरिकहरू दुर्घटनामा घाइते भएको र घाइतेहरूको अवस्था गम्भीर रहेको डिएसपी वस्नेतले बताए ।