सुनसरी, ७ फागुन । सुनसरीको कोशी गाउँपालिकाको वडा नम्बर–६ स्थित सप्तकोशी कृषि फार्ममा बर्डफ्लु रोगको संक्रमण पुष्टि भएको छ । कृषि तथा पशुपन्छि विकास मन्त्रालयले आज यसबारे जानकारी दिएको हो ।

बर्डफ्लु पुष्टि भएसँगै कृषि मन्त्रालयले संक्रमण फैलिन नदिनका लागि सप्तकोशी कृषि फार्मलाई केन्द्रबिन्दु मानी चार किल्ला तोकेर रोग नियन्त्रण गर्ने व्यवस्था गरेको छ । मन्त्रालयले प्रमुख जिल्ला अधिकारीलाई पत्र लेख्दै, फार्मका चारवटै दिशामा सिमाना तोकिएको जानकारी दिएको छ ।

सप्तकोशी फार्मबाट पूर्वतर्फ ५० मिटरको दूरीमा कच्ची बाटो, पश्चिममा खुल्ला मैदान २०० मिटर, उत्तरमा १५० मिटर र दक्षिणमा ३०० मिटरको दूरीसम्म किल्ला तोकिएको छ ।

मन्त्रालयले प्रमुख जिल्ला अधिकारीलाई निर्देशन दिँदै उक्त क्षेत्रभित्र बर्डफ्लु नियन्त्रणका लागि नियमावली २०७८ को अनुसार आवश्यक कदम चाल्न र समन्वय गर्ने आग्रह गरेको छ । यदि अन्य स्थानहरूमा पनि बर्डफ्लु संक्रमण फैलियो भने त्यहाँ पनि यस्तै रोग नियन्त्रण प्रक्रिया लागू गरिने मन्त्रालयले जनाएको छ ।

कृषि तथा पशुपन्छि मन्त्रालयले संक्रमणको चाँडो नियन्त्रणका लागि सबै निकायसँग सहकार्य र समन्वयको आवश्यकता रहेको जनाएको छ ।