जनकपुरधाम, ५ फागुन । यस वर्षको विद्यालय स्तरीय क्रिकेट प्रतियोगिता जनकपुरधामस्थित निर्माणाधीन रामजानकी बहुउद्देशीय अन्तर्राष्ट्रिय रंगशालामा आयोजना हुने भएको छ ।

प्रतियोगितामा सहभागी हुने इच्छुक विद्यालयहरूलाई आगामी फागुन १० गतेसम्म आफ्नो विद्यालयको नाम दर्ता गराउन आग्रह गरिएको छ ।

प्रतियोगितामा जम्मा १२ वटा विद्यालय टिमलाई सहभागी गराइनेछ । निर्धारित मितिपछि दर्ता गर्ने विद्यालयलाई समावेश नगरिने जिल्ला क्रिकेट संघ धनुषाले जनाएको छ ।

यो प्रतियोगिता जिल्ला क्रिकेट संघ धनुषाका आयोजनामा हुँदैछ । यसले युवा क्रिकेट खेलाडीहरूको क्षमतालाई उजागर गर्न र नयाँ प्रतिभाहरूको पहिचान गर्न महत्त्वपूर्ण भूमिका खेल्ने अपेक्षा गरिएको छ ।

विद्यालयस्तरीय यस क्रिकेट प्रतियोगितामा सहभागी विद्यालयहरूले क्रिकेटको माध्यमबाट आपसी प्रतिस्पर्धा र खेलकुदको भावना विकसीत गर्ने अवसर पाउनेछन् ।