सुनसरी, ५ फागुन । नेपाल थारु संघ इटहरी उपमहानगरको प्रथम अधिवेशन भव्य रूपमा सम्पन्न भएको छ।

थारु समुदायका अधिकार, पहिचान र सामाजिक उत्थानका लागि समर्पित यस संघको अधिवेशनबाट शंकर चौधरी सर्वसम्मत रूपमा सभापति चयन भएका हुन्।

थारु समुदायको हकहित र समृद्धिका लागि क्रियाशील नेपाल थारु संघ इटहरी उपमहानगरको नयाँ नेतृत्व चयन गर्ने उद्देश्यसहित सम्पन्न अधिवेशनमा चौधरीलाई सर्वसम्मत रूपमा सभापति चयन गरिएको छ । उनको नेतृत्वमा संघको आगामी कार्यकालमा अझ प्रगति हुने विश्वास व्यक्त गरिएको छ।

संघका अन्य पदाधिकारी तथा सदस्यहरूले नव-निर्वाचित सभापति शंकर चौधरीको नेतृत्वमा थारु समुदायको समग्र हितलाई प्रवर्द्धन गर्ने अपेक्षा गरेका छन्। अधिवेशनमा नेपाल थारु संघका वरिष्ठ सदस्यहरू, समाजसेवी, राजनीतिक व्यक्तित्वहरू, बुद्धिजीवी तथा स्थानीय समुदायका प्रतिनिधिहरूको उल्लेखनीय उपस्थिति रहेको थियो।

सभापति शंकर चौधरीलाई बधाई दिँदै नेपाली कांग्रेस इटहरी–७ का उपसभापति जय नारायण चौधरीले उनको अनुभव, लगनशीलता र समर्पणले थारु समुदायको आवाजलाई अझ सशक्त बनाउने विश्वास व्यक्त गरे। उनले चौधरीको नेतृत्वमा थारु समुदायका मौलिक अधिकारको रक्षा, सामाजिक उत्थान तथा विकासका क्षेत्रमा महत्वपूर्ण योगदान पुग्ने धारणा व्यक्त गरे।

अधिवेशनको अवसरमा नेपाल थारु संघ इटहरी उपमहानगरले थारु समुदायको हक, अधिकार र समृद्धिका लागि अझ सशक्त भूमिका निर्वाह गर्ने प्रतिबद्धता जनाएको छ। संघले सामाजिक न्याय, शिक्षा, आर्थिक समृद्धि, भाषा, संस्कृतिको संरक्षण तथा थारु समुदायको पहिचानलाई प्रवर्द्धन गर्न विभिन्न कार्यक्रम सञ्चालन गर्ने लक्ष्य लिएको छ।

अधिवेशनबाट संघको आगामी कार्यकालका लागि नयाँ कार्यसमिति समेत चयन गरिएको छ।

संघको उपसभापतिमा रामानन्द चौधरी र अनिता चौधरी, सचिवमा एलिना चौधरी र रमेश कुमार चौधरी सह-सचिवमा चन्दन चौधरी र कोषाध्यक्षमा ज्ञानिसा चौधरीलाई सर्वसम्मत चयन गरिएको हो ।

त्यस्तै, सदस्यहरूमा सुस्मिता चौधरी, गीता देवी चौधरी, महेश चौधरी, पदमनी चौधरी, उर्वशी देवी चौधरी, मेनुका कार्की चौधरी, सीता चौधरी, अन्जीत चौधरी, जय कृष्ण चौधरी र अशोक चौधरी चयन भएका छन् ।

नयाँ कार्यसमितिमा सभापति शंकर चौधरीले एकजना सह-सचिव र सात जना सदस्य पछि मनोनित गर्नेछन्। संघले नयाँ मनोनयनका लागि आवश्यक प्रक्रिया अगाडि बढाउने तयारी गरेको छ।

नेपाल थारु संघ इटहरी उपमहानगरले समुदायको आर्थिक, सामाजिक तथा सांस्कृतिक उत्थानका लागि विभिन्न अभियान सञ्चालन गर्दै आएको छ। नव-निर्वाचित कार्यसमितिले थप प्रभावकारी योजनाहरू अगाडि सार्ने प्रतिबद्धता जनाएको छ।

संघले विशेष गरी थारु समुदायको शिक्षा, स्वास्थ्य, आर्थिक सशक्तिकरण तथा भाषा-संस्कृतिको संरक्षणमा ध्यान केन्द्रित गर्ने योजना बनाएको छ। साथै, थारु समुदायको मौलिक हक र पहिचानलाई सुरक्षित गर्न संघले सरकार तथा अन्य सरोकारवालासँग सहकार्य गर्दै जाने बताएको छ।

सभापति शंकर चौधरीले आफ्नो नेतृत्वमा संघलाई थप मजबुत बनाउँदै थारु समुदायको हकहितका लागि प्रभावकारी कार्यक्रम सञ्चालन गर्ने प्रतिवद्धता व्यक्त गरे। उनले समुदायको एकता, सामाजिक न्याय र विकासका लागि सबै पक्षसँग सहकार्य गर्दै अघि बढ्ने बताए।