बारा, ४ फागुन । बाराको जितपुरसिमरा उपमहानगरपालिका वडा नम्बर–२ स्थित शुभलाभ ट्रेडर्स अगाडि आइतबार एक ट्रकको ठक्करबाट मोटरसाइकल चालक उदित नारायण झाको मृत्यु भएको छ ।

प्रहरीका अनुसार पथलैयाबाट वीरगन्जतर्फ आउँदै गरेको ना ६ ख २८९५ नम्बरको ट्रकले विपरीत दिशाबाट जाँदै गरेको ना ४० प ४१९५ नम्बरको मोटरसाइकललाई ठक्कर दिँदा यो दुर्घटना भएको हो । दुर्घटनामा मोटरसाइकल चालक झा घटनास्थलमै मृत्यु भएको छ ।

दुर्घटनामा अर्का एक जना यात्री उत्पल आचार्य गम्भीर घाइते भएका छन् । प्रहरी प्रवक्ता प्रकाश सापकोटाका अनुसार घाइते आचार्यको दाहिने खुट्टा र टाउकोमा चोट लागेको छ । उनको उपचार वीरगन्जस्थित एलएस न्यूरो अस्पतालमा भइरहेको छ ।

दुर्घटनापछि ट्रक चालक सन्दीप भुजेल र सहचालक सुशील थापालाई पक्राउ गरिएको छ । भुजेल धादिङ गजुरी–६ पोखरी खोला घर भएका छन् । थापा पनि सोही स्थानका छन् ।

पक्राउ परेका दुबैजनालाई जिल्ला प्रहरीको हिरासतमा राखेर घटनाको विस्तृत अनुसन्धान भइरहेको प्रहरीले जनाएको छ ।