मुख्य प्रशिक्षकका लागि क्यानले खोल्यो आवेदन

काठमाडौं, ३ फागुन । नेपाल क्रिकेट संघ (क्यान) ले पुरुष राष्ट्रिय क्रिकेट टिमको मुख्य प्रशिक्षकको पदका लागि आवेदन खुलाएको छ ।
शनिबार क्यानले सार्वजनिक गरेको सूचनामा मुख्य प्रशिक्षकका लागि आवेदन दिने प्रक्रिया सुरु गरिएको जानकारी दिइएको छ ।
क्यानले इच्छुक उम्मेदवारका लागि केही योग्यताका मापदण्डहरू तय गरेको छ । उम्मेदवारलाई ईसीबी (इंग्ल्याण्ड क्रिकेट बोर्ड) वा क्रिकेट अस्ट्रेलियाको लेवल ३ को मान्यता प्राप्त प्रशिक्षण प्रमाणपत्रको साथ ५ वर्षको अनुभव हुनु पर्नेछ ।
साथै, उम्मेदवार एसोसियट राष्ट्रहरूको क्रिकेट गतिविधि र प्रगतिको बारेमा पनि जानकार हुनुपर्ने शर्त राखिएको छ ।
अन्तिम मिति फेब्रुअरी २८ तोकिएको छ । जसअन्तर्गत इच्छुक उम्मेदवारले आफ्नो आवेदन पठाउनुपर्नेछ ।
यस पदको लागि आवेदन खुल्नेसँगै क्यानले भारतीय प्रशिक्षक मोन्टी देशाईसँगको दुई वर्षे सम्झौतापछि उनको सम्झौतामा नवीकरण नगरेको जानकारी पनि दिएको छ ।
मोन्टी देशाईसँगको सम्झौता गत महिना समाप्त भएको थियो । अब क्यानले नयाँ प्रशिक्षकको खोजी सुरु गरेको छ ।


