एजेन्सी, ३ फागुन । उत्तर प्रदेशको प्रयागराजस्थित महाकुम्भ मेलामा स्नान गर्न गइरहेका भक्तजनहरूको गाडी दुर्घटनामा परेको छ । बोलेरो र बस ठोक्किँदा १० जनाको मृत्यु भएको छ भने १९ जना घाइते भएका छन् ।

घटना शुक्रबार राति करिब २ बजे प्रयागराजको मिर्जापुर राजमार्गको मेजा क्षेत्रमा भएको हो । प्रहरीका अनुसार छत्तीसगढको कोरबा जिल्लाका भक्तजनहरू संगममा स्नान गर्न प्रयागराज आउँदै थिए । ती भक्तजनहरूको बोलेरो गाडीलाई तेज गतिमा रहेको एउटा बसले ठक्कर दिएको थियो ।

प्रहरीले घटनाको जानकारी प्राप्त गर्दै घटनास्थलमा पुगेर उद्धार कार्य थालेको छ । घाइतेहरूलाई प्राथमिक उपचारपछि स्थानीय अस्पतालमा पठाइएको छ भने गम्भीर घाइतेहरूको उपचारका लागि जिला अस्पताल रेफर गरिएको छ ।

मुख्यमन्त्री योगी आदित्यनाथले घटनाबारे जानकारी प्राप्त गर्दै छानबिन र उद्धार कार्यमा तीव्रता दिनका लागि सम्बन्धित अधिकारीहरूलाई निर्देशन दिएका छन् ।

घटनामा मृत्यु हुने सबै श्रद्धालुहरू बोलेरो गाडीमा यात्रा गरिरहेका थिए । उनीहरू सबै मध्य प्रदेशको राजगढ जिल्लाका बासिन्दा थिए । स्थानीय बटुवाहरूले घटनाको बारेमा प्रहरीलाई जानकारी गराएका थिए ।

प्रहरीले मृतकको शवलाई पोस्टमार्टमका लागि पठाएर दुर्घटनाको कारणबारे अनुसन्धान गरिरहेको छ ।

घाइते भक्तजनहरू संगममा स्नान गरेर वाराणसी जाने योजना राखेका थिए ।घाइतेहरूलाई रामनगरको सीएचसी अस्पतालमा भर्ना गरिएको छ ।