कैलाली, २९ माघ । कञ्चनपुरको भीमदत्त नगरपालिका–१२ वडा कार्यालय नजिक सोमबार राति मोटरसाइकल दुर्घटनामा दुई जनाको मृत्यु भएको छ ।

जिल्ला प्रहरी कार्यालय कञ्चनपुरका अनुसार मोटरसाइकल सडक छेउको डिभाइडरमा ठोक्किएर दुर्घटना भएको हो ।

प्रहरी निरीक्षक डम्मर भट्टले दिएको जानकारी अनुसार भीमदत्त नगरपालिका–१३ बडैपुरका २१ वर्षीय गणेश विष्ट र भीमदत्त नगरपालिका–१६ का २१ वर्षीय कैलास सिंह साउँदको दुर्घटनामा परी मृत्यु भएको छ ।

घटनामा मोटरसाइकल चालक साउँद र पछाडि सवार विष्ट गम्भीर घाइते भएका थिए । उनीहरूलाई उपचारको लागि तत्काल महाकाली अस्पताल पुर्याइएको भए पनि अस्पतालले दुबैलाई मृत घोषणा गरेको हो ।

दोधारा चाँदनीबाट महेन्द्रनगरतर्फ गइरहेको सुपप्र ०१–०१२ प ९२४९ नम्बरको मोटरसाइकल डिभाइडरमा ठोक्किँदा दुर्घटना भएको प्रहरीको प्रारम्भिक अनुसन्धानबाट खुलेको छ । साउँदले मोटरसाइकल चलाइरहेका थिए भने विष्ट पछाडि सवार थिए ।

प्रहरीले घटनाबारे थप अनुसन्धान गरिरहेको जनाएको छ ।