रौतहट, २९ माघ । पूर्व पश्चिम राजमार्ग अन्तर्गत रौतहटको चन्द्रपुर नगरपालिकास्थित चाँदी पुलमा आज बिहान एक गम्भीर सवारी दुर्घटना भएको छ ।

बिहान करिब ८ः२० बजे सर्लाहीतर्फ जाँदै गरेको स्कार्पियो (ना ४ च ३६९४) र विपरीत दिशाबाट आइरहेको ट्रक (बा प्र ०१–००६ ख ५७२९) ठोक्किँदा पाँच जना गम्भीर घाइते भएका छन् । घाइतेमध्ये एकजनाको अवस्था गम्भीर रहेको छ ।

दुर्घटनामा स्कार्पियो चालक सुदीप कुमार यादव (२०) सहित अन्य चार जना सवार थिए । यादवको टाउको, मुख र निधारमा गहिरो चोट लागेको छ ।

त्यस्तै, प्रशान्त ठाकुर (१८) को बायाँ हात, दाहिने आँखा र भौंमा चोट लागेको छ । रामविनय महतो (२१) को दाहिने हात र निधारमा मध्यम चोट रहेको छ भने प्रदीप कुश्वाहा (१८) को निधार, टाउको र कानमा चोट लागेको छ । सबै घाइतेहरूलाई तत्काल उपचारको लागि चन्द्रपुर प्रालि अस्पतालमा लगिएको छ ।

घटनामा सबैभन्दा गम्भीर रूपमा घाइते भएका सन्तोष कुशवाहा (२८) को टाउको र चिउँडोमा चोट लागेको छ र उनको अवस्था चिन्ताजनक रहेको अस्पतालका प्रमुख डाक्टर सुभाष चौधरीले जनाएका छन् । अन्य घाइतेहरूको अवस्था सामान्य रहेको र उनीहरूको उपचार भइरहेको छ ।

दुर्घटनामा संलग्न ट्रक चालक दोलखाको जिरी नगरपालिका–४ का २८ वर्षीय फुरी तामाङलाई इलाका प्रहरी कार्यालय चन्द्रनिगाहपुरले नियन्त्रणमा लिएको छ । प्रहरीको प्रारम्भिक अनुसन्धानले दुर्घटनाको कारण प्रस्ट नभएको जनाइएको छ । थप अनुसन्धान भइरहेको जनाइएको छ ।

इलाका प्रहरी कार्यालय चन्द्रनिगाहपुरका इन्स्पेक्टर विशाल तामाङका अनुसार घटनास्थलमा शान्ति सुरक्षा कायम गर्न सई महानन्द कुमार यादवको कमान्डमा प्रहरी टोली परिचालन गरिएको छ ।