काठमाडौं, २७ माघ । नेपाल कम्युनिष्ट पार्टी (नेकपा) माओवादी केन्द्रका अध्यक्ष पुष्पकमल दाहाल प्रचण्डले देशमा ठूलो आन्दोलनको आवश्यकता महसुस गर्दै जनताको निराशा र असंतुष्टि बढ्दै गएकोमा चिन्ता व्यक्त गरेका छन् ।

उनले आइतबार काठमाडौंमा संविधान निगरानी समूह र आईएसएसआरद्वारा आयोजित एक कार्यक्रममा सम्बोधन गर्दै देशमा नयाँ आन्दोलनको आह्वान गर्न सक्ने सम्भावनाको कुरा गरेका छन् ।

प्रचण्डले भने, ‘नेपालमा एउटा ठूलो आन्दोलन आवश्यक हो कि भनेर मलाई नै लाग्न थालेको छ । के देशले फेरि एउटा अर्को आन्दोलन खोजेको हो?’ उनले जनतामा निराशा बढ्दै गएको भन्दै आन्दोलनको आवश्यकता बल्झिरहेको बताएका छन् । ‘जनतामा निराशा बढेको छ । अब प्रश्न चाहिँ विस्तारै मानिसहरूको मनमा आउँदैछ,’ उनले थपे ।

युवाहरूमा देखिएको फ्रस्ट्रेशन र असन्तोषले संविधानको मिचाइ र वर्तमान सरकारको असंवैधानिकता संकेत गर्दै नेतृत्वले सुधारका लागि ध्यान दिनुपर्ने बेला आएको अध्यक्ष प्रचण्डले बताए ।

उनले भने, ‘मैले विद्रोह गर्ने निष्कर्षमा पुगेँ भन्ने अर्थ नलागोस् । युवाहरूको फ्रस्टेशन देख्दा नेतृत्वले पनि संविधान मिच्ने काम गरेको छ ।’

त्यस्तै, प्रचण्डले वर्तमान सरकारलाई संविधानसँग मेल नखाने भएको बताउँदै यस सरकारको गठन असंवैधानिक रहेको टिप्पणी गरे । ‘यो सरकार बनेको पनि संविधानसम्मत विल्कुल लागेकै छैन,’ उनले भने ।