जनकपुरधाम, २७ माघ । जनकपुरधामबाट सर्लाहीको बरहथवा जाँदै गरेको बस दुर्घटना हुँदा ६ जना यात्रु गम्भीर घाइते भएका छन् ।

दुर्घटना महोत्तरी जिल्लाको माइस्थानबाट करिब तीन किलोमिटर पश्चिममा पूर्वपश्चिम राजमार्गमा आइतबार दिउँसो भएको हो ।

दुर्घटना परेको बसको नम्बर ना५ख २८५१ रहेको प्रहरीले जनाएको छ । जिल्ला प्रहरी कार्यालय महोत्तरीका अनुसार बस आफैं अनियन्त्रित भई पल्टिएको थियो ।

प्रहरीका अनुसार बसमा सवार अन्य केही यात्रु पनि सामान्य घाइते भएका छन् । गम्भीर घाइतेहरूलाई तुरुन्तै उपचारका लागि बर्दिबास पठाइएको छ ।

प्रहरीले दुर्घटनाको कारणबारे थप अनुसन्धान भइरहेको जनाएको छ । यात्रुहरूले बस तीव्र गतिमा रहेको र सम्भवतः त्यसैकारण दुर्घटना भएको हुनसक्ने अनुमान गरेका छन् ।