एजेन्सी, २६ माघ । २७ वर्षपछि दिल्लीमा फेरि भारतीय जनता पार्टी (भाजपा) को सरकार बन्ने देखिएको छ । भारतको निर्वाचन आयोगका अनुसार २०२५ को विधानसभा निर्वाचनमा भाजपा ४८ सिट जित्न सफल भएको छ । पछिल्लो पटक सन् १९९८ मा भाजपाले दिल्लीमा सरकार बनाएको थियो । तर, त्यसपछि लामो समय दिल्लीमा कांग्रेस र पछिल्ला वर्षमा आम आदमी पार्टी (आप) को वर्चस्व रहेको थियो ।

भाजपाले यस पटकको चुनावमा ४८ सिट जितेर नयाँ इतिहास कायम गरेको छ । सन् २०२० मा मात्र ८ सिट जित्न सफल भएको भाजपाले यस पटक ६ गुणा बढी सिट जित्न सफल भएको छ । भाजपा नेता प्रवेश वर्माले आम आदमी पार्टीका प्रमुख नेता अरविन्द केजरीवाललाई ३ हजार मतले पराजित गर्दै नयाँ दिल्ली निर्वाचन क्षेत्रमा जित हासिल गरेका छन् ।

आम आदमी पार्टी (आप) ले यस पटक २२ सिट मात्र जित्न सकेको छ । यो सन् २०२० को तुलनामा ३९ सिटले कम हो । पार्टीका नेता अरविन्द केजरीवाल नयाँ दिल्लीबाट पराजित भएका छन् भने मनीष सिसोदिया पनि जंगपुरामा पराजित भएका छन् । अरु धेरै उम्मेदवारहरूको जमानत जफत भएको छ । केजरीवालको निर्वाचन क्षेत्रमा २० जना उम्मेदवारहरूले आफ्नो जमानत गुमाएका छन् ।
तर, मुख्यमन्त्री आतिशी कालकाजी निर्वाचन क्षेत्रबाट विजयी भएकी छन् । पार्टीका अर्का नेता सत्येन्द्र जैन भने यस पटक चुनाव हारेका छन् ।

भाजपाको यस शानदार विजयलाई लिएर दिल्लीको भाजपा मुख्यालयमा ठूलो विजयोत्सव मनाइएको छ । पार्टीका वरिष्ठ नेता र कार्यकर्ताहरूले जितको खुसीयाली मनाइरहेका छन् । भाजपा उम्मेदवार प्रवेश वर्माले केजरीवाललाई पराजित गरेका छन् । उनी पार्टीका शक्तिशाली नेता अमित शाहलाई भेट्न पुगेका छन् ।

यस पटकको निर्वाचनमा भाजपाको भोट शेयर ९ प्रतिशतले बढेको छ । जबकि आम आदमी पार्टीको भोट शेयर १० प्रतिशतले घटेको छ । यद्यपि कांग्रेसले कुनै सिट जित्न सकेको छैन । पार्टीको भोट शेयर भने २ प्रतिशतले बढेको देखिएको छ । भाजपाले २०२० को तुलनामा ३९ सिट थप्न सफल भएको छ भने आपले त्यति नै सिट गुमाएको छ ।

यो चुनावको नतिजाले दिल्लीको राजनीतिक परिदृश्यमा ठूलो परिवर्तन ल्याएको छ । आम आदमी पार्टीको निरन्तर शासनलाई चुनौतिहरू थपिँदै गर्दा भाजपाले आफूलाई वैकल्पिक शक्तिको रूपमा स्थापित गर्न सफल भएको छ । कांग्रेसले भने सिट जित्न नसके पनि आफ्नो भोट शेयर केही सुधार गरेको छ ।