एजेन्सी, २३ माघ । अमेरिकी अन्तर्राष्ट्रिय विकास नियोग (यूएसएआईडी)ले विश्वभर रहेका आफ्ना कार्यलयमा कार्यरत अमेरिकी नागरिकहरूलाई अमेरिका फिर्ता बोलाउँदै विश्वव्यापी प्रशासनिक बिदाको घोषणा गरेको छ ।

यूएसएआईडीले एक सूचना जारी गर्दै शुक्रबार फेब्रुअरी ७ को रातिबाट निश्चित कर्मचारीबाहेक अन्यलाई प्रशासनिक बिदामा राख्ने जनाएको छ ।

सूचनामा भनिएको छ, ‘शुक्रबार, फेब्रुअरी ७, २०२५, राति ११ः५९ मा सबै मिसन–महत्वपूर्ण कार्यहरू, मुख्य नेतृत्व र विशेष रूपमा तोकिएका कार्यक्रमहरूको लागि जिम्मेवार कर्मचारीहरूबाहेक विश्वव्यापी रूपमा प्रशासनिक बिदामा राखिनेछ ।’

यस निर्णय अनुसार निश्चित कर्मचारीहरूलाई बिहीबार, फेब्रुअरी ६, दिउँसो ३ बजे एजेन्सी नेतृत्वद्वारा सूचित गरिने पनि बताइएको छ । ती कर्मचारीहरूले मात्र आवश्यक मिसनहरू सञ्चालन गर्न जारी राख्न सक्नेछन् ।

यूएसएआईडीले आफ्नो मिशन र राज्य विभागसँग समन्वय गर्दै हाल विदेशमा तैनाथ रहेका कर्मचारीहरूको फिर्ता यात्राको योजना पनि बनाइरहेको छ ।

एजेन्सीले सबै लागू आवश्यकताहरू र कानूनहरू पालना गर्दै ३० दिनभित्र संयुक्त राज्यमा फिर्ता ल्याउनको लागि व्यवस्थापन गर्ने र त्यसको खर्चसमेत ब्यहोर्ने योजना बनाएको छ । यसैगरी, आवश्यक नभएका सम्झौता तथा परियोजनाहरूलाई रोक्नेसमेत बताइएको छ ।