झापा, माघ २२ । झापाको कनकाई नगरपालिका अन्तर्गत तुलसीबारी क्षेत्रमा लागूऔषध कारोबारीलाई समात्न खोज्दा प्रहरीले गोली चलाएको छ । घटनामा भारतीय नागरिक अञ्जर आलम घाइते भएका छन् । उनको बायाँ खुट्टामा गोली लागेको छ ।

प्रहरीका अनुसार घटनास्थलमा ६ राउण्ड गोली चलेका थिए । एक राउण्ड गोली आलमको खुट्टामा लागेको हो । घाइते आलमलाई तत्काल अस्पतालतर्फ ल्याइएको छ ।

यसै क्रममा आलमका भाइ युसुफ आलमलाई प्रहरीले पक्राउ गरेको छ । उनीहरुको साथबाट ३२ ग्राम ब्राउन सुगर बरामद भएको छ ।

प्रहरीका अनुसार तुलसीबारी क्षेत्रमा लागूऔषध कारोबारी समात्न जिल्ला प्रहरी कार्यालय, झापा र लागूऔषध नियन्त्रण ब्यूरोको टोली सक्रिय रहेको थियो ।

तुलसीबारी क्षेत्र नेपाल–भारत सीमा नजिक पर्ने भएकोले लागूऔषध तस्करीको जोखिम सधैँ उच्च रहेको छ । यसै कारण प्रहरीले कडा निगरानी गरिरहेको बताइएको छ ।