जनकपुरधाम, २२ माघ । पूर्व–पश्चिम राजमार्ग अन्तर्गत धनुषाको गणेशमान चारनाथ नगरपालिका–१ मा दुईवटा मोटरसाइकल ठोक्किँदा चार जना युवक घाइते भएका छन् ।

ज १३ प १०२९ नम्बरको मोटरसाइकल पश्चिमबाट पूर्वतर्फ जाँदै गर्दा सोही दिशातर्फ गइरहेको ज ८ प ७३०७ नम्बरको मोटरसाइकलले पछाडिबाट ठक्कर दिँदा दुबै मोटरसाइकलमा सवार युवकहरू दुर्घटनामा परेका हुन् ।

दुर्घटना हुँदा चारै जना गम्भीर घाइते भएका छन् । जिल्ला प्रहरी कार्यालय धनुषाका प्रवक्ता प्रहरी नायव उपरीक्षक बरुणबहादुर सिंहका अनुसार घाइते हुनेहरुमा ज १३ प १०२९ नम्बरको मोटरसाइकलका चालक धनुषाको गणेशमान चारनाथ नगरपालिका–४ का २६ वर्षीय महादेव यादव र पछाडि सवार २२ वर्षीय सुदीपकुमार यादव रहेका छन् ।

त्यसैगरी ज ८ प ७३०७ नम्बरको मोटरसाइकलका चालक सिरहाको कल्याणपुर नगरपालिका–६ का २३ वर्षीय अफ्ताब राइन र पछाडि सवार गणेशमान चारनाथ नगरपालिका–२ का २५ वर्षीय नसालुन राइन घाइते भएका छन् ।

घाइतेहरूलाई तत्कालै नजिकैको अस्पतालमा उपचारका लागि पुर्याइएको छ । मोटरसाइकलको तीव्र गतिका कारण दुर्घटना भएको अनुमान गरिएको छ ।

प्रहरी घटनास्थल पुगेर दुर्घटनाबारे अनुसन्धान सुरु गरेको बताइएको छ ।