जनकपुरधाम, १९ माघ । जनकपुरधामको कपिलेश्वर खेल मैदानमा आयोजित शहीद सत्यनारायण मेमोरियल कप अन्तर्गतको फाइनल खेलमा कपिलेश्वर क्रिकेट टिमले कप्टौल क्रिकेट टिमलाई ७ विकेटले पराजित गर्दै प्रतियोगिता जितेको छ ।

फाइनल खेलमा कपिलेश्वर क्रिकेट टिमले टस जितेर पहिले फिल्डिङ रोजेको थियो । कप्टौल क्रिकेट टिमले निर्धारित २० ओभरमा १८४ रनको चुनौती पेश गरेको थियो । कपिलेश्वर क्रिकेट टिमले १४ ओभरमै ३ विकेटको क्षतिमा १८५ रन पुरा गर्दै शानदार जित हासिल गर्यो ।

कपिलेश्वर क्रिकेट टिमका अनिकेत यादवले ३७ बलमा अविजित ६९ रन बनाउँदै उत्कृष्ट प्रदर्शन गरे । उनको अद्वितीय खेलको लागि उनलाई फाइनल खेलको म्यान अफ द म्याच घोषित गरियो । यस खेलमा कपिलेश्वर टिमका अन्य खेलाडीहरूले पनि आफ्नो उत्कृष्ट खेल प्रदर्शन गरे । प्रतियोगितामा वेस्ट बलरको उपाधि कप्टौल क्रिकेट टिमका विनय यादवले प्राप्त गरे ।

धनुषा जिल्लाका १६ वटा क्रिकेट टिमहरूको सहभागिता रहेको यो प्रतियोगिता निकै प्रतिस्पर्धात्मक थियो । विजेता बनेको कपिलेश्वर क्रिकेट टिमलाई ३१ हजार रुपैयाँ नगद र ट्रफी प्रदान गरिएको छ भने उपविजेता कप्टौल क्रिकेट टिमलाई २१ हजार रुपैयाँ नगद र ट्रफी दिइएको छ ।

पुरस्कार वितरण कार्यक्रममा जनकपुरधाम उपमहानगरपालिकाका प्रमुख मनोज कुमार साहले खेलकुदको विकासमा निरन्तर लागिरहने प्रतिबद्धता व्यक्त गरे । उनले खेलकुदको माध्यमबाट युवालाई सकारात्मक दिशा र अवसरहरू दिनको महत्त्वमा जोड दिएका थिए ।

कार्यक्रममा वडाध्यक्ष रामचन्द्र पाजियार, वरिष्ठ पत्रकार श्रीनारायण साह, जसपा युवा नेता अम्बु प्रसाद साह लगायतका प्रमुख व्यक्तित्वहरूले खेलकुदको महत्त्व र यसको प्रभाव बारे धारणा राखेका थिए ।