नवलपरासी, १९ माघ । नवलपरासीको दुम्कीबासमा यात्रुबाहक दुई सवारीसाधन ठोक्किँदा एक भारतीय नागरिकको मृत्यु भएको छ भने अन्य ९ जना घाइते भएका छन् ।

प्रहरीका अनुसार मृत्यु हुने व्यक्ति भारतको पश्चिम बंगाल राज्यका ४० वर्षीय शंकर नामका यात्रु हुन् । मृतकको थर अझै खुल्न सकेको छैन । उक्त दुर्घटना विनयी त्रिवेणी गाउँपालिका–१, दुम्कीबासस्थित डिभिजन वन कार्यालयनजिकै भएको हो ।

काठमाडौंबाट दाङ जाँदै गरेको रा. १ख ३३६१ नम्बरको बस र बुटवलबाट काठमाडौं आउँदै गरेको माइक्रोबस एक आपसमा ठोक्किएका थिए ।

दुर्घटनामा मृत्यु भएका व्यक्ति माइक्रोबसका यात्रु थिए भने माइक्रोबसमा सवार अन्य सबै भारतीय नागरिक हुन् । उनीहरूको स्थानीय अस्पतालमा उपचार भइरहेको छ । घाइतेहरूको अवस्था सामान्य रहेको अस्पताल स्रोतले जानकारी दिएको छ ।

प्रहरीले दुर्घटनाको कारणबारे अनुसन्धान भइरहेको बताएको छ ।