जनकपुरधाम, माघ १९ । जनकपुर नाइट्सले अपराजित यात्रासहित नेपाल कबड्डी लिग (एनकेएल) को पहिलो संस्करणको उपाधि जित्न सफल भएको छ ।

त्रिपुरेश्वरस्थित दशरथ रंगशालाको कभर्डहलमा सम्पन्न रोमाञ्चक तथा प्रतिस्पर्धात्मक फाइनल खेलमा जनकपुरले काठमाडौँ माभरिक्सलाई ४५–४१ को झिनो अन्तरले पराजित गर्दै च्याम्पियन बन्ने गौरव हासिल गरेको हो ।

जनकपुरले लिग चरणमा आफ्नो उत्कृष्ट प्रदर्शनलाई निरन्तरता दिँदै पाँच खेलमध्ये चार खेल जितेको थियो भने एक खेल बराबरीमा टुंगिएको थियो । यसअघि, क्वालिफायर वानमा विराटनगर ब्यान्डिट्सलाई पराजित गर्दै फाइनलमा प्रवेश गरेको जनकपुरले अन्ततः काठमाडौँलाई हराउँदै सात खेलसम्म अपराजित रहँदै पहिलो उपाधि आफ्नो पक्षमा ल्यायो ।

फाइनल खेलको पहिलो हाफमा जनकपुरले २५–१९ को अग्रता लिएको थियो । दोस्रो हाफमा काठमाडौँले उत्कृष्ट पुनरागमन गर्दै खेललाई ३४–३४ को बराबरीमा ल्याएर अग्रता लिन सफल भए तापनि अन्तिम क्षणमा जनकपुरले पुनः लय समात्दै खेलमा आफ्नो पकड बलियो बनायो । जनकपुरको उत्कृष्ट रणनीति र खेलाडीहरूको एकता अन्ततः विजयी प्रमाणित भयो ।

काठमाडौँ माभरिक्सले दोस्रो हाफमा २२–२० को अग्रता लिएर जितको आशा जगाए पनि निर्णायक क्षणमा सम्हालिन नसक्दा उपाधि गुमाउन पुगे । खेलको रोचक मोडमा जनकपुरले आफ्ना प्रमुख खेलाडीहरूलाई अगाडि सार्दै जितलाई सुरक्षित गर्न सफल रह्यो ।

उपाधिसँगै जनकपुर नाइट्सले नगद ५ लाख रुपैयाँ पुरस्कारसहित आकर्षक ट्रफी हात पारेको छ । उपविजेता बनेको काठमाडौँ माभरिक्सले नगद २ लाख रुपैयाँ पुरस्कार प्राप्त गरेको छ ।