एजेन्सी, १६ माघ । भारतको मध्य प्रदेश उच्च अदालतले एक महत्त्वपूर्ण फैसला सुनाउँदै ससुराको सम्पत्तिमा ज्वाइँले अधिकार दाबी गर्न नसक्ने ठहर गरेको छ ।

भोपालका दिलीप मरमठ आफ्नो ससुराको घरमा बस्दै आएका थिए । तर, ससुराले उनलाई घर खाली गर्न बारम्बार आग्रह गर्दा पनि दिलीपले मानेनन् । उल्टै उनले सो घरमा आफ्नो अधिकार रहेको दाबी गरे । त्यसपछि ससुरा अदालतको सहायता लिन बाध्य भएका थिए ।

सुरुमा ससुराले स्थानीय प्रशासन (एसडीएम) मार्फत मुद्दा दायर गरे । अदालतले घर तुरुन्त खाली गर्न आदेश दिएको थियो । यो आदेशपछि दिलीपले कलेक्टरको कार्यालयमा पुनरावेदन गरे । तर, कलेक्टरले पनि उनको अपिललाई अस्वीकार गरिदिए । अन्ततः दिलीपले मध्य प्रदेश उच्च अदालतमा पुनरावेदन गरे । त्यहाँ पनि उनको दाबीलाई खारेज गर्दै अदालतले घर तुरुन्त खाली गर्न आदेश दियो ।

दिलीपले घर बनाउन १० लाख भारु खर्च गरेको दाबी गरेका थिए । तर, अदालतले ससुराले उनलाई केवल घरमा बस्न अनुमति दिएको आधारमा सम्पत्तिमा कुनै अधिकार दाबी गर्न नसक्ने ठहर गर्यो ।

अदालतको फैसलामा भनिएको छ कि ज्वाइँले आफ्नो ससुराली घरमा बस्न पाउनु ससुराको अनुमति मात्र हो । न कि सम्पत्तिमा स्वामित्व । सासू ससुराले यदि कुनै सम्पत्ति ज्वाइँको नाममा किनेको भए मात्र उनले त्यसमा अधिकार दाबी गर्न सक्ने थिए । तर, यस्तो स्थितिमा त्यस्तो कुनै प्रमाण नभएकाले दिलीपलाई ससुराको घर खाली गर्न बाध्य पारिएको हो ।