जनकपुरधाम, १६ माघ । जनकपुरधामस्थित एजुकेशन प्वान्ट स्कूलको बस धनुषा जिल्लाको मिथिलाबिहारी नगरपालिकामा दुर्घटनामा परेको छ ।

बुधबार बिहान जनकपुरधामबाट विद्यार्थी लिन तारापट्टी जाँदै गरेको बस बाक्लो हुस्सुका कारण बाटो देख्न नसक्दा दुर्घटनामा परेको हो ।

बस दुर्घटना तारापट्टी र ठेराकोबीचमा भएको जिल्ला प्रहरी कार्यालय धनुषाले जानकारी दिएको छ । जिल्ला प्रहरी कार्यालय धनुषाका प्रवक्ता प्रहरी नायब उपरीक्षक वरुण बहादुर सिंहका अनुसार उक्त दुर्घटनामा चार जना विद्यार्थी घाइते भएका छन् । तीमध्ये एकको अवस्था मध्यम रहेको छ भने बाँकी तीन जनालाई सामान्य चोटपटक लागेको छ ।

स्थानीयहरूका अनुसार बस चालकले बाक्लो हुस्सुमा पनि अत्यधिक गतिमा सवारी हाँक्दा दुर्घटना भएको हो । बस अनियन्त्रित भई सडकबाट तल खेतमा पल्टिएको थियो ।