जनकपुरधाम, १२ माघ । शहीद कप क्रिकेट कमिटी जनकपुरधामले मधेश प्रदेशका मुख्यमन्त्री सतिशकुमार सिंहलाई ज्ञापनपत्र बुझाउँदै शहीद कप क्रिकेट प्रतियोगिताको शिर्षक परिवर्तन गरिएकोमा कडा आपत्ति जनाएको छ ।

कमिटीले यसै आर्थिक वर्षमा प्रतियोगिता सञ्चालनका लागि बजेट छुट्याउन माग गर्दै राजनीतिक पूर्वाग्रहका कारण शिर्षक परिवर्तन गरिएको ठहर गरेको हो ।

ज्ञापनपत्रमा मधेश प्रदेशको खेलकुद क्षेत्रमा गौरवको रुपमा स्थापित भइसकेको शहीद कप क्रिकेट प्रतियोगिताको नाम परिवर्तन गर्दा खेलप्रेमीमाथि आघात पुगेको र शहीदहरुको सम्मानमा आँच पुगेको उल्लेख छ ।

मधेश आन्दोलनका शहीदहरुको सम्झनामा २०७२ सालबाट सुरु भएको क्लबस्तरीय यो प्रतियोगिता इण्डो–नेपाल प्रतियोगिता हुँदै चौथो संस्करणमा शहीद कप अन्तरप्रदेश क्रिकेट प्रतियोगिताको रुपमा आयोजना भएको थियो । यो प्रतियोगिताको स्वामित्व मधेश प्रदेश सरकारको खेलकुद तथा समाज कल्याण मन्त्रालयले लिएको थियो ।

प्रदेश सरकारले यस प्रतियोगितालाई आगामी दिनमा भव्य रुपमा आयोजना गर्ने प्रतिबद्धता विभिन्न मञ्चमा व्यक्त गरिसकेको अवस्थामा अन्तिम समयमा शिर्षक परिवर्तन गर्ने निर्णयलाई कमिटीले अस्वीकार्य भनेको छ । प्रतियोगिता सञ्चालन हुन नसके चरणबद्ध आन्दोलनको कार्यक्रम ल्याउन बाध्य हुने चेतावनीसमेत दिइएको छ ।

मधेश प्रदेशका खेलकुदप्रेमीबीच प्रतिष्ठाको रुपमा रहेको शहीद कप क्रिकेट प्रतियोगिताको शिर्षक परिवर्तनबाट सिङ्गो समुदाय आक्रोशित भएको र त्यसको समाधानका लागि प्रदेश सरकारलाई पहल गर्न दबाब दिइएको छ ।