जनकपुरधाम, २८ पुष । जय ट्रफी मेन्स एलिट कप अन्तर्गतको खेलमा त्रिभुवन आर्मी क्लबले मधेश प्रदेशलाई ८ विकेटले हराएको छ ।मधेश प्रदेशले दिएको २८ रनको लक्ष्य आर्मीले २ विकेटको क्षतिमा पूरा गर्दै जित हासिल गर्यो ।

त्रिभुवन आर्मीले पहिले ब्याटिङ गर्दै ९ विकेटको क्षतिमा २२५ रन बनायो र आफ्नो पारी समाप्ति घोषणा गर्याे । मधेश प्रदेश भने १०२ रनमै अलआउट भएको थियो । र, फलो अनमा पर्यो । दोस्रो इनिङमा मधेश प्रदेशले १५० रन मात्रै जोड्न सक्यो, जसका कारण आर्मीलाई २८ रनको लक्ष्य प्राप्त भयो ।

आर्मीका लागि इमरान सेख र बसिर अहमदले महत्वपूर्ण योगदान गरे । इमरान र बसिरको साझेदारीले आर्मीलाई सहज जित दिलायो । यद्यपि त्रितराज दास र सन्तोष कार्की सस्तोमा आउट भए ।

त्रिभुवन आर्मीको जितमा प्रमुख भूमिका स्पिनर सहाब आलम र अलराउन्डर बसिर अहमदले खेले । सहाब आलमले पहिलो इनिङमा ६ विकेट र दोस्रो इनिङमा ३ विकेटसहित कुल ९ विकेट लिए । यद्यपि बसिर अहमदले ६७ रनको महत्वपूर्ण पारी खेले । दोस्रो इनिङमा ४ रनमा नटआउट रहंदै विजयी चौका प्रहार गरे । उनले मधेश प्रदेशको पहिलो इनिङमा १ विकेट र दोस्रो इनिङमा ४ विकेट लिए ।

मधेश प्रदेशका लागि ओपनर मयन यादवले ४९ रन बनाए पनि अन्य ब्याटरहरू रन बनाउन असफल भए । यसैबीच त्रिभुवन आर्मी क्लब अब फाइनलमा पुग्न नजिक पुगेको छ भने मधेश प्रदेश प्रतियोगिताबाट बाहिरिएको छ ।